Ki miho manera ta pa inicia e temporada di fin di aña presenciando e bunita concierto di Pasco cu nos soprano Tica Giel, acompaña pa pianista Johnny Scharbaay y coro ‘Den Harmonia’ bou direccion di Jane Lanooij.
Un soprano ta un cantane femenino cu e tono di bos di mas halto di tur e tipo di bosnan. Y aki na Aruba nos tin e privilegio di tin nos soprano Tica Giel. Tica a studia canto clasico na Muziek Pedagogische Academie na Alkmaar cerca Maartje Uipkes-Kliffen y opera na Sweelinck Conservatorium na Amsterdam cerca Cora Canne Meyer y Margreet Honig.
Tica, acompaña pa nos talentonan local, lo deleita esnan presente cu un variacion di canticanan di Pasco. Algun di e canticanan ta: Laudate Dominum cu acompañamento di fio toca pa Hester Mathijsse, Beautiful field of the Angels, Nochi di paz, O Niño chikito, Gloria na Dios, Sleep Little Jezus, sin laga afo e tan gusta cancion ‘Lamanta’ di Lilia Luidens. Varios cantica ta cu bunita areglo pa e coro acompañando e solista den su canto.
Ta pidi un contribucion di AWG 35,00 pa presencia e bunita concierto aki, cual lo tuma luga diabierna 9 di december na Misa Birgen di Fatima na Dakota pa 8 or di anochi. Ticket pa e concierto ta obtenibel na Dowco Sta. Cruz, Lucor Jewelers y na Huki di Buki di Misa Birgen di Fatima.
Esaki ta e di tres biaha cu nos soprano Tica Giel ta coopera cu Misa Birgen di Fatima door di presenta un concierto pa recauda fondo pa yuda renoba Misa Birgen di Fatima.
Pastoor Daniel y e comite organisado ta extende un invitacion na tur parokiano di Misa Birgen di Fatima y na e comunidad di Aruba en general pa bin presencia e bunita concierto ‘Bonbini Niño Hesus’. Di antemano danki y cu Señor bendiciona boso ricamente.