Despues di algun dia ta busca lider di partido POR Sr. Otmar Oduber a acerca su persona pa wak kico ta e desaroyonan cu ta pasando den e formacion di gobierno y e desaroyonan cu ta pasando den politica di parti di POR.
Den comunidad tin un tension cu ta bibando, tension pa un cambio tuma luga rapido aki na Aruba, pa cu resultado di eleccion sumamente positivo pa tin un coalicion. Tin combersacionnan andando na e momentonan aki, y diamars mainta Sra. Formado tabata cerca gobernador, pa duna un recuento di kico tur a tuma luga na e momentonan aki. Tin combersacionnan interno, Sr. Oduber ta purba manten’e mas interno cu ta posibel.
Sinembargo, diamars POR tabata tin un reunion den conseho di partido POR, pa tuma un decision. Diahuebs lo tuma luga den Parlamento e credencialnan pa miembronan di Parlamento nobo, cu tin cu asumi responsabilidad diabierna y cu ta huramenta diabierna.
Den e transicion cu mester tuma luga, pa cu un gobierno nobo, mientras cu no tin un gobierno, Parlamento nobo mester sinta cu tin mayoria pa nombra su gobierno. POR a confirma diamars loke ya ta conoci cu Oduber y Bikker lo ta e personanan cu lo huramenta diabierna pa asumi e responsabilidad pa representa pueblo.
Pero hopi importante tabata e hecho cu nan a tuma un decision, of ratifica un decision a base di un protocol cu e partido POR a firma, caminda cu un gobierno mester asumi su responsabilidad y POR tin su dos candidato pa minister den e gobierno nobo, cu e ora ey dos candidato nobo lo mester asumi su responsabilidad den parlamento. A base di e protocol firma, nan ta haci historia, cu ta respeta e protoco y como tal e dos siguiente candidatonan cu ta carga mayoria di votonan pa asumi responsabilidad lo ta Sra. drs. Marisol Lopez- Tromp y e di dos ta bira Sr. Allan Howell pa representa pueblo den Parlamento di Aruba.
Manera ya ta conoci, e ley di kiesverordering no a pasa, pero POR como partido, no mester di ley pa obedece nan loke nan ta acorda ariba dje atrabes di protocolnan cu a wordo firma. Y den e caso aki, nan ta mustra un biaha mas cu nan ta marca historia un biaha mas.
Mirando cu tin e proceso cu tin cu bay hunto cu esaki y unabes cu e gobierno nobo ta cla pa asumi responsabilidad, e dos candidatonan di POR pa minister, e ora lo tin dos candidato nobo pa drenta Parlamento. Den e caso aki, mr. Joselin Croes, a respeta e protocol y a mustra caba cu e ta sede su posicion na Sr. Allan Howell, cu ta e siguiente candidato cu a saca mayoria di voto.
Unabes cu POR ta den gobierno, nan fraccion den parlamento lo sostene e proyecto di Ley caminda cu den futuro, esun cu tin mas cantidad di voto, ta esun cu lo drenta Parlamento.
A puntra Sr. Otmar Oduber tambe tocante e redo cu ta core rond riba rednan social cu tin problema di diferencia entre e miembronan di partido POR, pa cual Sr. Oduber a bisa cu esakinan ta wordo fomenta intencionalmente, ora cu mira mensahenan cu tin ariba rednann social, cu tin problema cu partido POR, cu Andin Bikker, cu lo tin pleito entre Allan Howell y Joseline Croes, cu Marisol Lopez- Tromp lo ta bringando pa bay Hulanda. Esaki ta puro redo y ta desmenti categoricamente. Al contrario, tin un proceso andando cu lo n drenta den detaye, caminda tin un programa di partido ta papiando ariba e diferente posibilidadnan pa loke ta reparticion di carteranan, con esakinan lo bay.
Sr. Oduber semper a pone su curason na loke ta turismo di Aruba y como primicia, semper ta bon pa refresh pa bin cu ideanan nobo, pensamentonan nobo. E dinamica di combersacionnan ta sigui tuma luga pa formacion di gobierno, tira tiki awa den biña y ta laga turismo y Airport pa otro bay carga e responsabilidad. E ta un bay y bin, pa haya un match pa e persona mas adecuado pa ehecuta e programa di partido di gobierno, cu tambe simultaneamente ta canando.
E combersacionnan na mesa ta andando hopi bon keto bay, dus ta nenga categoricamente cu tin problemanan na mesa. Nan ta hopi leu cu’n programa bastante extenso, hasta te un tiki di mas na detaye y cierto momento esey a wordo referi na dje. Importante ta , segun Oduber cu ta touch tur e temanan, a menciona Aruparking, unda MEP y POR tin un diferencia di opinion. Pero ora di sinta na mesa ta haya un Hybrid solucion. A pone tambe den e acuerdo cu lo bin un organo special, cu lo haya conseho ariba dje, y otro nan lo kier bay di acuerdo of desacuerdo, pasobra toch ta Parlamento ta esun cu ta dicidi.
E acuerdo cu tabata tin entre POR y MEP, ta purba logra na un Parlamento nobo pero di biaha tambe un gobierno nobo. Pero e ultimo cos cu partido POR lo kier haci, ta sostene un gobierno cu pueblo a castiga cu mas di dies mil voto, cu nan a wordo rechasa y saca for di gobierno, lo ta manera un mangel hopi zuur cu lo bo tin cu bay tuma den e dianan nos dilanti. A purba haci e intento maximo pa screening, etc. pa tuma luga pa diabierna, pa tur dos por tuma luga simultaneamente, pero esey ta den man di Formado y lo lag’e na su discrecion.
Ta sigui cu e mesun respet y cu sano huicio prevalece, bou guia di Nos Creador, pueblo di Aruba, pronto, si no ta diabierna awo, pero pronto lo por tin un gobierno nobo, segun lider di partido POR, Sr. Otmar Oduber.