Sharin Luydens, Hefe di Censo ta bisa MasNoticia cu e proceso di paspoort ta actualmente canando mesun cos. No tin nada particular of extra di loke ta rekeri normal cu mester tene cuenta cu ne.
Por bisa si cu antes e paspoortnan tabata yega mas lihe for di Hulanda, y pa es motibo antes tabata duna un espacio di 2 siman pa bin buske. Aworaki sra. Luydens ta informa cu ta tardando mas cu normal y Censo ta duna un espacio di 3 siman.
Con lihe un paspoort ta yega Aruba despues di e peticion, ta bon pa e cliente sa cu esaki NO ta den man di Censo na ningun momento, segun sra. Luydens ta comparti cu MasNoticia. Censo tampoco por duna prioridad na ningun peticion pa yega mas lihe Aruba. “Esaki ta completamente den man di autoridad Hulandes y nan proceso”, sra. Luydens ta bisa.
Censo kier recorda tur hende y pone enfasis riba e hecho con importante e ta pa bo tin bo paspoort na ordo. Controla esaki cada bes pa no haya bo cu e sorpresa cu bo paspoort a caduca y bo mester viaha. Corda tambe pa cuida y proteha bo paspoort bon, y ward’e den un caminda sigur.