Dia 1 di mei, ariba Dia di Obrero, comunidad Surinam, estableci na Aruba lo tene un evento pa asina celebra Dia di Surinam.
Dia di Surinam mester wordo mira como un dia unda cu e comunidad Surinam lo kier presenta nan cultura, e diferente manera di biba, e habitonan alimentario, unda cu e comunidad Surnameño ta bin hunto, pero nan kier celebra e dia aki hunto cu e comunidad Arubano.
E evento aki lo tuma luga den stadion Frans Figaroa, unda cu e evenemento lo cuminsa pa 11 or di mainta y lo sigui te cu 8 or di anochi.
E comision a prepara full un programa pa e dia aki, unda cu lo tin shownan cultural, evenementonan deportivo y tambe, a yena e dia cu diferente cuminda tipico, unda cu e pueblo lo por cera conoci cu esakinan, como tambe nan bebida tipico y nan musica.
E dia aki tin como meta pa asina e comunidad por bin hunto, pa celebra hunto, unda cu e comunidad Surnameño pa asina cera conoci cu otro, comparti e experiencia cu e pueblo di Aruba, y asina sa poco mas di e cultura Arubano.
Lo tin diferente weganan popular caminda cu un y tur por participa. E comision ta spera di pasa un dia agradabel hunto cu e pueblo di Aruba.
Por ultimo, nan kier a informa cu e participacion y cooperacion cu nan a haya di parti di gobierno y esunnan encarga cu Stadion Frans Figaroa tabata grandi. Y tambe e sponsornan cu no a duda pa duna nan contribucion na loke lo bira un dia sumamente agradabel.