Dialuna 1 di maart Parlamento lo trata e cambionan den nos codigo civil cu ta inclui geregistreerd partnerschap. Si e cambionan goza cu sosten di mayoria e lo habri caminda pa parehanan di mesun sexo por forma union civil. Awor aki parehanan di mesun sexo ta obliga di forma un union den exterior p.e. casa na Bonaire y despues bin registra e matrimonio na censo. Sinembargo e registracion ta unicamente ceremonial pasobra e no ta otorga ningun di e derechonan manera propiedad, herencia, asuntonan fiscal cu otro parehanan ta goza di dje.
Desafortunadamente e actual Minister di Husticia Andin Bikker, tempo e tabata parlamentario, a elimina e schakelbepaling for di e amienda. Asina deprivando parehanan di mesun sexo e oportunidad di consecuentemente adkiri tur e derecho y beneficionan cu ta fundamental pa biba den union.
Articulo 8 di e Convencion Europeo di Derechonan Humano (CEDH) ta establece e derecho di respet pa bida priva y di famia, cas y correspondencia. Den e caso Oliari y Otronan vs Italia, Corte Europeo di Derechonan Humano a establece e obligacion positivo pa estadonan ofrece reconocimento legal pa parehanan di mesun sexo. Gobierno siguiendo un opinion di HOF, cu aparentemente ta desvia di e contenido di Articulo 8, tin planea di ofrece algun derecho fundamental manera propiedad, alimentacion y herencia pa esnan den union civil.
Segun HOF posponiendo e otorgamento di e asina yama derechonan supletorio manera custodia di mucha, asuntonan fiscal y servicionan social lo no causa cu Aruba ta den violacion di e CEDH. Esaki ta un concluision eroneo paso e ta sigui depriva parehanan di e mesun sexo reconocimento legal di un forma cu ta comparabel y ta inclui tur e derechonan cu un matrimonio tradicional ta encera.
Nos di ACCION 21 a haci un estudio cientifico cu mas di 1500 participante y cu un margen di eror di 2.5%. Un di e topiconan cu a ser cubri ta enlace entre parehanan di mesun sexo. Esaki ta algun di e resultadonan:
Pa parehanan di mesun sexo Na fabor Contra No sa
Union Civil 49% 32% 19%
Matrimonio 46% 37% 17%
Den comunidad claramente tin mas hende ta sostene cu opone tanto union civil como matrimonio pa parehanan di mesun sexo.
Edad Na fabor
Union Civil Contra
Union Civil No sa
Union Civil Na fabor
Matrimonio Contra
Matrimonio No sa
Matrimonio
18 – 29 76% 11% 14% 73% 16% 11%
30 – 44 59% 26% 15% 54% 33% 13%
45 – 59 40% 41% 19% 37% 45% 18%
60+ 28% 43% 29% 27% 49% 24%
E mesun division di opinion cu ta existi entre personanan di diferente edad tambe ta existi entre personanan di diferente nivel di enseñasa. Esnan cu un nivel di enseñasa limita ta 69% contra union civil pa parehanan di mesun sexo. Esey ta den contraste cu personanan cu un nivel di enseñasa avansa cu ta 77% na fabor di union civil pa parehanan di mesun sexo.
Den siglo 21 sigur no tin mas espacio pa discriminacion y tampoco prehuicio. Nos di partido ACCION 21 tin hancra den nos statuut un compromiso firme pa cu derechonan humano.
Artikel 4 Obhetivo y recursonan
d. realisa un politica den cual ta garantisa un sociedad habri, liber y husto, cu ta basa ariba derechonan fundamental di libertad, igualdad, comunidad y solidaridad.
g. promove un sociedad den cual labor, husticia individual y social, prosperidad, bienestar y seguridad di tur ciudadano ta wordo salvaguardia, pa di e forma aki tur prehuicio of discriminacion a base di rasa, color di cuero, religion, edad, limitacion, genero, orientacion sexual, privilegionan profundamente hancra y desigualdad, por wordo rechasa.
