Comunidad por entrega comentario na DIP riba concepto di ROPV

Pa e proceso di introduccion di e Plan Preparatorio di Desaroyo Teritorial cu Reglamentacion 2019 (ROPV), conforme ley recientemente tabatin tres ‘Townhall meeting’ organisa pa DIP cu tabata bon atendi pa comunidad. Bon puntonan y preguntanan al caso a bin dilanti cu a habri e espacio pa trece adaptacion na e concepto di ROPV. Esaki ta forma parti di e proceso democratico pa su introduccion oficial cual ta premira di ta cla durante e prome kwartaal di 2020.
Desde prome di October e concepto di ROPV (cROPV) tabata ‘ter inzage’ na diferente localidad y online, comunidad por a tuma nota di e plan na oficina di DIP durante un periodo di un luna (te cu prome di November 2019).

Periodo zienswijze
Desde prome di November a inicia cu e proceso di zienswijze cu lo tuma luga te cu prome di December. Unda cu comunidad por entrega comentario y pensamentonan por escrito a base di locual cu a mira of constata den e temporada di un luna di inzage riba e concepto di e ROPV. Director di DIP Haime Croes, a informa cu ya a cuminsa ricibi algun zienswijze. Aspectonan importante pa esnan cu ta entrega zienswijze ta, pa specifica kico nan ta mira, kico nan kier cambio den dje, e motibo cu kier e cambio aki y na unda.
Despues di proceso aki tambe lo tin un periodo di un luna pa esnan cu a presenta nan comentarionan por escrito, cu por presenta esakinan tambe (verbal) na DIP.
Gobierno lo tin seis luna pa entrega e concepto definitivo di ROPV (Gobierno ta calcula un period menos, pues cu esaki lo tuma dos luna), pa e cana su caminda legal via Raad van Advies, despues dos siman na Parlamento. Pesey ta calcula cu pa final di e prome kwartaal di 2020 e ROPV lo ta vigente.

Comments

comments