Cuminsando dia 27 di juli, e colonia Peruano residencia na Aruba ta celebra nan Dia Nacional, Esaki ta tuma luga den Centro di Bario Dakota, cuminsando for di den oranan di merdia. Sra Livaney Lujan, Vice presidente di e Fundacion Fiestas Patrias Peruanos en Aruba a elabora ariba e actividadnan cu lo tin en conexion cu e celebracion importante aki.
E dia aki ta wordo caracterisa pa e platonan tipico di Peru, manera anti-cuchos, ceviche, tamal, pachamanga, etc. Pa e dia aki e grupo “Los Amigos” lo deleita e publico presente cu musica di Peru. Actividadnan deportivo no por keda afo.
Si mester indica cu e celebracion mes lo ta riba diadomingo, 28 juli, ora cu ta recorda y celebra e di 198 aña di independencia di Peru. Guillermo Salinas, presidente di e fundacion a splica cu e celebracion lo tuma diadomingo mes. El a extende un invitacion na henter e comunidad Peruano pa participa den e Programa Protocolar cual ta programa pa cuminsa pa 10’or di mainta y lo dura te cu 12.30 di merdia den Wilhelmina Park. Minister, Parlamentario y Diplomaticonan a haya invitacion pa participa den e ceremonia aki.
Sr. Salinas a conta, en corto, e historia di e lucha di Peru pa haya nan independencia, despues cu pa hopi siglo nan tabata esclavo tempo di Rey Carlos V di Spaña. Despues di hopi lucha y perdida humano, e pais aki a logra haya su independencia.
Pa recorda e fecha aki henter comunidad di Aruba ta wordo invita pa bin celebra y participa den e reconocemento cu lo wordo duna na algun persona. Nan a gradici Sr. Stan Dabian di Departamento di Cultura cu a contribui na organisacion di e celebracion aki.