Sra. Yvette Geerman di Departamento di Higiena ta pidi pa comunidad ta mas critico na momento di cumpra cierto producto.
Sra. Geerman ta spica cu Salubridad Publico t’ey pa supervisa y keda controla e tipo di situacionnan aki, pero ta keda na pueblo pa ta mas consciente ora di cumpra productonan y cu nan ta pagando pa e calidad di e producto ey. No simplemente critica por medio di Facebook, sino notifica tambe na Departamento di Salud Publico. Pues e apelacion ta keda cu si tin cualkier iregularidad den productonan cu pueblo ta cumpra, sea bon di acerca e departamento cu e informacionnan aki. Na final e unico forma pa proteha pueblo di situacionnan asina ta pa departamento traha conhuntamente cu pueblo pa combati e benta di productonan venci y di mal calidad.
Tambe e negoshinan cu ta bende nan productonan tin e responsabilidad di bende cosnan drechi, cual den hopi ocasion nan no a cumpli. Aunke den hopi ocasion sa sosode cu e negoshi ta purba huy di su responsabilidadnan, pasobra no tin suficiente prueba cu e producto a bin di e negoshi ey. Eynan ta ora consumidornan mester tin nan recibo semper cu ta comproba cu tal producto a wordo cumpra na tal negoshi y trece pruebanan asina na Salubridad Publico p’asina nan por ehecuta nan trabou cu mas eficiencia.
Sra. Geerman ta haci un apelacion na comunidad pa semper keda a atento y critico na tur momento cu nan ta bay cumpra un producto y na cua negoshi nan ta cumpr’el e.