No ta na Aruba so cu tin atencion poni pa elimina e productonan cu plastic y hopi personanan individual, pero tambe companianan ta bezig di con pa reduci e cantidad di plastic pa yuda den medio ambiente. Management Director di Directie Natuur & Milieu, Sr. Gisbert Boekhoudt cu mas detaye.
Ta asina cu por a wak den noticianan internacional cu a haya un Bayena morto y ora nan a hay’e tabata yen cu plastic. Asina tambe por wak cu e uzo di plastic tin impacto riba e bida marino, pero tambe riba nos naturalesa riba tera.
En berdad cu tin diferente plastic mas duradero, den celular of den auto pero tambe tin plastic cu ta wordo uza pa un biaha so. Recientemente a pasa e ley di plastic unda cu e saconan mester reusa pero despues ta wordo tira afo.
Tin hopi mas productonan manera cuchiu, straw, forki cu ta wordo uza un biaha so y depues e material ta wordo benta afo. E material aki ta haci daño na medio ambiente y ta pone henter atencion riba esaki. Tambe por ripara banda di hotel area cu tin copinan di plastic ta bula bay den lama. E ora ta keda e pregunta e pakico no pone un stop na frontera di Aruba pa importacion di e tipo di materialnan aki.
Por haya tayo, cups, pijp, saconan y awe dia ta haya cu nan ta biodegradabel, cu ta disolve despues di 100 dia, entre otro. Ta depende di kico ta wordo pidi ora di cumpra por stop e tipo di materialnan cu no ta biodegradabel y no keda perde e tempo controlando negoshinan un pa un pa no bende esakinan.
Esaki a wordo discuti varios biaha caba, caminda cu e proyectonan aki mester tin un apoyo hopi mas grandi. Full e comunidad mester bin hunto pa esaki por tin exito. Pa bin cu’n ley sin cu tin e apoyo aki, ta manera landa contra di coriente. Mester traha hunto como comunidad y esaki ta e direccion pa bira mas sostenibel y tene medio ambiente na cuenta.
Esaki ta conta den e parti riba nos mes riba kico nos ta come tambe y eynan e impacto ta, pero si no tin un ley pa cuminsa cambia e structura, cera e frontera y stop cu esaki specialmente den e companianan cu ta traha banda di lama tambe.
Directie Natuur & Milieu sigur ta contempla pa implementa medidanan pa bienestar di medio ambiente, y kier ta duna chance na Minister cu tin 6 luna den servicio pa dun’e espacio pa considera tur esakinan.
Tin e deseo pa amplia e ley di e saconan di plastic. Pa e por conta pa mas obhetonan di plastic entre otro, den e mesun linea cu Union Europeo cu a haci’e recientemente y henter mundo ta buscando pa bay den e direccion aki.
Esaki ta un opcion y ta trahando riba e maneho pa bay riba e caminda aki, caminda cu e ley di saco di plastic, pero a bin cu un otro cu’n logo cu ainda toch tin negoshinan ta uzando esakinan. Pregunta ta keda, unda e ley ta pa cu e accionnan aki.
Den todo caso, e ley ta necesario y a wordo dirigi na esun cu ta tira saco di sushi por nada, unda cu e usuario ta laganan bay. Tin hende cu ta anda responsabel cu e saco di plastic y tin hende cu no.
Mester cumpli cu ley y ta responsabel caminda cu e daño a acumula. Awo cu e ley t’ey, cada biaha e ta bira menos. Pero mester tin un caminda pa haci presion na esunnan cu ainda no ta civilisa y tene cuenta mas cu medio ambiente.
Tambe tin diferente departamento concerni cu ta yudando cu esaki, banda di Directie Natuur & Milieu y City Inspector. DNM tin un partnership cu AHATA riba diferente tema cu ta wordo proponi den cada meeting pa bay dilanti riba hospitalidad, bon servicio y calidad riba turismo unda cu dos aña pasa a bin cu e item aki. Proximamente ta bay pone mas atencion riba e maneho di plastic, segun Sr. Gisberth Boekhoudt, di Directie Milieu & Natuur.