NEW YORK, Merca- Despues di e detencion arbitrario di e presidente di e Asamblea Nacional di Venezuela, Juan Guaido, door di funcionarionan di e Servicio Bolivariano de Inteligencia Nacional (Sebin), pa lag’e den libertad un rato despues, presidentenan di e region y e comunidad internacional a duna nan opinion tocante esaki y a condena e accion aki.
“Condena y rechaso absoluto pa e secuestro di e Presidente interino di Venezuela, Juan Guaido. Comunidad internacional mester stop e crimennan di Maduro y su combo”, asina e secretario general di OEA, Luis Almagro, a scirbi ariba su cuenta di Twitter.
E canciyer di Chile, Roberto Ampuero den oranan di atardi, a informa cu el a papia cu e presidente di e Asamblea Nacional, Juan Guaido, na telefon. Esaki a splik’e e detayenan di su detencion arbitrario diadomingo door di funcionarionan di e Servicio Bolivariano di Inteligencia Nacional (SEBIN).
Di otro banda, gobierno di Colombia a urgi presidente di Venezuela, Nicolas Maduro, pa respeta e facultado di e Asamblea Nacional.
“Respeta e facultad di e Asamblea Nacional y e hurisdiccion y integridad di e diputadonan, y facilita e proceso di normalisacion constitucional na Venezuela, cu e meta di cu e orden democratico wordo plenamente reestableci, como tambe e estado di derecho”, segun un comunicado emiti pa e canciyeria Colombiano.
Tanto e canciyernan di Argentina, como di Peru a expresa nan solidaridad cu e dirigente Venezolano.
Nan a califica e incidente como un episodio cu ta atenta contra di e libertadnan civil y politica di e Venezolanonan, den e caso aki, di e presidente di e Asamblea Nacional (AN), y ta ratifica e necesidad urgente di reestablece orden democratico na Venezuela y e respet pa e derechonan humano.
Di otro banda, presidente di e partido Ciudadanos di Spaña, Albert Rivera, a mustra su apoyo tambe na e diputado Juan Guaido, y a indica cu e comunidad internacional mester haci “tur lo posibel” pa e dignidad y e balentia di e pueblo Venezolano triunfa ariba ” e dictadura Chavista”.
E cantante y compositor Spaño, Miguel Bosé, cu semper tabata un critico ferviente di e gobierno di Nicolas Maduro, tabata un di e figuranan internacional cu a mustra su apoyo na e presidente di e Asamblea Nacional di Venezuela, cu a manda tambe un mensahe duro pa e mandatario Venezolano.