MEXICO CITY, Mexico – Mexico a gara un complice importante di Joaquin “El Chapo” Gusman. Ministerio di Husticia di e pais, anuncia diamars e aresto di Damaso Lopez Nuñez riba Twitter. Detayenan a sigui despues.
Lopez tin e apodo El Licenciado, pasobra e ta un hurista diploma y ta traha pa e Ministerio Publico. E tabata entre otro responsabel pa prizonnan di seguridad halto.
Como hefe di prizon, Lopez tabata tin un papel importante durante e prome escape di El Chapo for di prizon, na 2001.
El Chapo a keda te cu 2014 sin ningun rastro y e banda, e cartel di Sinaloa, por a crece bira un di e cartelnan mas poderoso y peligroso di Mexico.
El Chapo finalmente a wordo gara pero a huy na 2015 un biaha mas. Despues di un buskeda gigantesco, aña pasa el a wordo aresta y finalmente entrega na Merca. Mientras tanto Lopez y e yiunan di El Chapo, ta bringa pa e poder den e cartel.
Fuente: ANP