Na e Isla Westerland cu ta forma parti di e asina yama “Waddeneilanden” localisa pa nort di Hulanda y parti west di Alemania y Dinamarca den Noordzee pa di 33 biaha ta auspicia e competencia mundial di windsurf den tres disciplina. E evento aki ariba e PWA Tour ta esun mas grandi cu ta atrae un publico di mas cu 200.000 spectador. Sylt ta conoci como e Saint-Tropez di parti nort di Europa. Alemania casi no tin lama y deportenan acuatico y di bela ta hopi gusta manera windsurf, kiting , foiling y sailing. Deportenen cu na Aruba ta comun y coriente y un atraccion pa e turista Europeo. Na e evento aki ta unda 10 aña pasa cu Sarah-Quita ta obtene su prome trofeo como sub-campeon den freestyle y ta haya reconocemento como e regatista di windsurf mas hoben kende a gana un PWA Grand Slam na edad di 15 aña. E tempo ey e organisadonan a expresa e deseo di ta anhela pa mira Sarah-Quita subi den top di e mundo di windsurf. Awe, dies aña despues por mira cu esey ta e caso. No solamente den un disciplina pero den tres, freestyle , slalom y ola. Na 2014 Sarah-Quita ta cuminsa participa den e disciplina di Ola riba PWA Tour. Sylt ta e di tres evento di un total di 5 unda e ta logra termina na tercer luga. Durante e competencianan anterior na Islanan Canaria e ta termina respectivamente na di dos y di cuatro luga cu ta pone cu pa awor aki e ta na di tres luga riba ranking mundial den e disciplina di Ola. Apesar di tin un calendar hopi pisa di windsurf den tres disciplina y otro actividadnan manera fotoshoot pa su sponsornan y TedxAruba, Sarah-Quita ta mantene su bista riba e meta su dilanti y ta cumpli.