Manera ta custumber pa hopi aña caba, e club di natacion Aruba Dolphins ta organisa su competencia di 1, 3 y 5km den Commandeurs Baai na Savaneta riba diadomingo 23 di september. E competencia aki ta conoci como un di esunnan di mas exclusivo y dificil di Aruba. Pa varios siman atletanan y nan coachnan ta entrenando fuertemente pa e campeonato aki. Registracion pa e competencia ta tuma luga diadomingo cuminsando pa 8or di mainta na e pier di Zeerovers na Savaneta. E salida y yegada lo ta na e pier di Zeerovers.
Lo bay tin boeinan special indicando e salida, ruta pa landa y yegada. Binti minuut prome cu e start di cada careda lo splica e ruta. E caredanan lo ta cuminsando pa 10am. Oficialnan di Arubaanse Zwembond lo ta na encargo di e parti di e resultadonan. Ceremonia di entrega di premio lo tuma luga 2.00 pm. Ta premia e prome tresnan di cada categoria y lo entrega trofeo na e ganadonan general. Directiva di Aruba Dolphins , nos atletanan, nos sponsernan Banco di Caribe, Total IAQ Solutions N.V. y Bonbini Cargo Services ta invita pueblo di Aruba cordialmente pa bin presencia e bataya den lagoen di Savaneta, alabes apoya nos atletanan den deporte di natacion. Pa e reglanan di participacion bishita www.arubadolphins.com