Comision Organisado Arte di Palabra Aruba cu cooperacion di Gobierno di Aruba ta organisando e competencia di Arte di Palabra 2017 cual lo tuma luga riba diasabra 4 di maart 2017, cuminsando pa 6’or di atardi den Cas di Cultura.
E hobennan di diferente scol segundario ta competi cu nan poema y storia cortico den nos dushi idioma Papiamento. Tur aña e creatividad y e entusiasmo di e hobennan ta uno cu ta creciendo mas y mas.
Desde 2009, Comision Arte di Palabra Aruba, ta organisa e competencia di poesia y storia cortico entre e hobennan di Enseñansa Avansa.Y tambe un competencia di Haiku pa publico general.
Dos persona lo ser reconoci durante di e anochi aki mirando nan trayectoria y logronan.
E aña aki, Comision Arte di Palabra Aruba, a propone pa duna reconocemento na un persona cu a aporta grandemente na e desaroyo di nos idioma materno Papiamento. Considerando e curiculo extenso di e persona riba e tereno aki, a tuma e decision di nombra Mag. Ling. Sr. Ramon Todd Dandare pa aña 2017.
Tambe lo duna un reconocemento special na un hoben cu a destaca y a contribui na nos idioma materno Papiamento, cu su creacionnan artistico y cancionnan.
Mirando tur e diferente composicionnan cu el a traha, cual ta un arte di palabra riba su mes, a tuma e decision di nombra Sr. Jonathan ‘Jeon’ Thiel como un ehempel pa nos hobennan, pa acepta un reconocemento pa aña 2017.
Comision ta invita henter e pueblo di Aruba, amantenan di poesia y storia cortico, tambe tur e scolnan pa bin apoya nos hubentud durante e anochi aki den Cas di Cultura caminda entrada ta completamente gratis.
Departamento di Cultura Aruba bou auspicio di Ministerio di Cultura ta felicita esnan cu a ricibi nan reconocemento di parti di Comision Organisado.