Companianan estableci cu ta relativamente grandi, ta cumpli basta cabalmente cu exigencianan di DTI. Hopi biaha ta haya contratistanan di personanan cu a imigra na Aruba den e ultimo temponan y nan no sa di e reglanan di trabao. Eseynan ta crea problema, segun director di DTI, sr. Dominico Werleman.
E ta sigui splica cu hopi biaha ta ripara cu despues di duna nan cierto cantidad di notificacion y cambio no ta tuma luga, ta yama nan bin na DTI, ta sinta cu nan, splica nan detayadamente kico e reglanan na Aruba ta, kico tin cu tene cuenta cune y tambe ta splica nan, cu si en caso nan sigui ta viola e stipulacionnan, e ora ta bay over na para e trabao.
Werleman a splica cu e sa pasa diferente biaha. Contratistanan chikito vooral ta haya nan mes den e situacion ey.
Tur eseynan ta bay yuda y mirando cu a cuminsa cu e sistema di introduci inspector di siguridad na pia di trabao cu esey tambe a ripara cu a cuminsa cana. Tin mas of menos 50 pa 70 hende a sigui e curso, pero no ta tur a wordo reconoci of haya e registracion cerca DTI como inspector di siguridad, pero si a ripara cu el a cuminsa cana y ta haya varios peticion di empresanan, sea pa nan manda nan hendenan sigui e training of haya un persona pa haci un analisis di nan trabao, con e situacion pa loke ta trata siguridad ta.
E intencion ta pa e cantidad di inspeccionnan lo bay subi mirando e cantidad di inspectornan di siguridad y e calidad tambe na pia di trabao, tambe esey mester por mehora cu tempo. Cu cada bes ta his’e un tiki mas cu e ta bay mehora. Esey ta contribui cu tin areanan di trabao mas sigur cu atrobe lo bay contribui den e parti financiero tambe locual ta cada bes cu tin un accidente na pia di trabao, e gasto ey mester wordo cubri y esey tambe ta bay yuda limita den e parti ey, segun Werleman.