DEN HAAG – Recientemente Minister Plenipotenciario Guillfred Besaril a ricibi representantenan di un compania Hulandes cu ta interesa pa traha cas na Aruba. Sr. Roland Soedamah y Ryan Blanca – gerente di e compania aki cu ta Buro Cite en Caribe Building Systems – a duna un presentacion na minister Besaril tocante e sistema nobo pa construi cas. Esaki ta un sistema cu den un tempo relativamente cortico por traha un cas, duradero y sostenibel.
Light steel framing technology, ta un sistema cu ta conosi na Hulanda, Europa y tambe den Caribe. Despues di instala e light steel framing riba plataforma ta cera esaki cu bloki pa despues yena e bloki cu cement. Un technologia nobo caminda e proceso ta tuma lugar hopi lihe.
Minister Besaril a duna un splicacion tocante e vision economico di gobierno pa diversifica e economia di Aruba y crea mas cupo di trabao. Tambe a informa cu gobierno a facilita e proceso pa ciudadadonan por haña un tereno mas lihe pa traha nan cas. Un peticion a wordu hasi na e representante di compania pa entrega tur nan certificado caminda por prueba cu e casnan aki ta safe pa wordo traha na Aruba.
Minister Besaril a keda hopi satisfecho cu presentacion y a palabra cu ta keda den contacto cu e representante nan di compania.