Despues cu a tarda hopi tempo pa logra un referedum nobo pa trahadonan di The Mill Resort, e doñonan a manipula trahadonan pa cual sindicato FTA no ta logra representa e trahadonan, pero lo warda wak kiko tempo lo bisa segun Sr. Hubert Dirks.
Dos aña pasa, e trahadonan a dicidi di scoge pa FTA, y sindicato a pidi un referendum, cual a wordo gana tambe. Mayoria di e trahadonan a scoge pa FTA y sindicato a negocia pa un tempo largo cu e doñonan. Den tur e tempo ey, tabata tin e opcion cu e compania lo wordo bendi, y sindicato a sinta tambe cue potencial cumpradonan. Na momento cu e doñonan nobo, nan a sinta dos biaha na mesa cu sindicato, pero el a cuestiona e CAO, y e abogado cu tabata defende e compania, a bisa nan cu e negocacion tabata t’ey caba, y e parti cu no tabata tin acuerdo ariba dje, lo por a negocia di nobo. E abogado a bay bek cerca e trahadonan, pero esaki a tarda, pa cual sindicato a pidi intermediacion di mediador di gobierno. Pero a bin resulta cu el a reuni cu e trahadonan, el a pone e trahadonan vota sea pa nan famia, of pa sindicato. E trahadonan mayoria a bisa cu nan kier nan famia. Sr. Dirks ta puntra su mes cu si ta asina mester traha na 2017, caminda cu e dunado di trabao ta puntra trahado si nan ta kies pa nan famia of pa sindicato, pa sali na defensa di nan derechonan.
Ta increibel cu esaki ta pasando, pero e ta un berdad, segun Sr. Dirks. A resulta tambe, cu e compania a cambia di abogado, pa atende cu sindicato. E ora a bin insistencia pa referendum, cual sindicato no tabata tin problema cu esaki. Finalmente e trahadona a vota y nan a kies contra FTA y a bay na fabor di compania.
Despues di 2 aña cu sindicato a yega na acuerdo cu CAO, caminda cu trahadonan a pasa den situacion dificil, aworaki un biaha mas e trahadonan ta sin sindicato atrobe. FTA ta precoupa cu akinan, ta represalia ta wordo tuma. Compania ta tuma un actitud anti- sindicato. FTA sa cu pa hopi dunado di trabao, nan no kier mira sindicato mes. Nan ta papia bunita, pero di berdad nan no kier tende di sindicato. Pero si e trahado no ta para fuerte e por spera explotacion, abuso etc. ohala esey no pasa, segun Sr. Dirks, cu no tin represaya contra esunnan cu si tabata kier representacion di sindicato, nan derechonan wordo respeta. Y loke compania a priminti e trahado, cu nan cumpli tambe. Si esey no ta e caso, e ora mester wak despues un cantidad di tempo, pa ley ta 6 luna, despues di esey, si e trahadonan kier un sindicato nan por bay bek pa afilia na un sindicato y pidi pa un referendum, segun Sr. Hubert Dirks, di sindicato FTA.