E proyecto di Earn Your Future ta sigui lanta e entusiasmo cerca nos hobennan pa nan siña maneha nan placa. E grupo di profesional financiero di PwC Aruba a bishita como 10 scol caba y e ultimo dia lo ta dia 15 di November unda cu nan lo bishita St Annaschool na Noord. Lorena Maduro kende ta director di Business Accounting Services na PwC a splica cu e proyecto aki su intencion ta pa duna muchanan di 6de klas basischool e conocimento necesario pa nan siña traha un budget, tuma desicionnan financiero riba nan mes y bira mas cauteloso con nan ta gasta nan placa. Lorena Maduro a splica cu como profesionalnan den e mundo financiero ta encontra nan mes hopi biaha cu debilidadnan cu hende tin na momento di handle placa y e ta kere cu un parti di e solucion ta pa cuminsa concientisa muchanan for di chikito con pa handle cu placa y motivanan pa haya interes riba e tereno aki.
E aña aki lo bishita alrededor di 15 scol y lo duna les na mas o menos 650 pa 700 mucha. E scolnan ta sumanente positivo pa haya e lesnan ya cu e muchanan ta siña algo nobo for di hendenan cu ta traha tur dia den e field aki y di otro banda e maestronan, SKOA y e departamento di Enseñansa Publico ta haya importante cu tin empresanan den e mundo comercial ta duna algo bek na nos comunidad.
E pakete di enseñansa aki a wordo traha na Merca y a adapta esaki na e situacion na Aruba. A pidi asistencia di SKOA y departamento di Enseñansa pa yuda den e proceso aki y siña e boluntarionan di PwC con pa duna les na e muchanan. Hopi bes e muchanan ta haya mas confiansa pa haci pregunta riba e di dos dia di les. Riba e dia aki e muchanan ta haya un les di practica pa asina siña balansa un budget di un famia y nan por duna nan ideanan con pa yuda e famia aki balansa su presupuesto. E muchanan ta bin cu hopi idea leuk y tambe nan ta siña con pa traha un budget pa nan mes.
Loke ta diferente e aña aki ta cu PwC a kies pa bishita scolnan den diferente districto. Por bisa cu tur siman tabata un districto specifico, cuminsando na San Nicolas, cu e meta pa bishita scolnan cu no a wordo bishita den pasado. Tambe e biaha aki PwC Aruba a regala e muchanan un “Grow Kit’ cu e intencion pa siña nan cu ‘loke bo planta awe, bo lo cosecha mañan’. Esaki simbolicamente lo recorda e muchanan cu loke nan siña awe, nan por uza den futuro door di spaar y traha cu un plan financiero.