CIUDAD DI VATICANO, Vaticano- E comittee organisado di e reunion tocante abusonan cu lo conta cu presencia di e herarkia Catolico e siman aki, lo reuni cu’n decena di victimanan entre cual e Spaño Miguel Hurtado, cu a denuncia e monhe di e monasterio Montserrat Andreu Soler, y tambe e Chileno Juan Cruz, entre otro.
E noticia aki a wordo confirma na EFE door di e Asociacion Infancia Robada, e prome di Spaña pa defende victimanan di abusonan sexual sufri den e ambito di Iglesia y tambe nan famia.
Miguel Angel Hurtado lo yega Roma acompaña door di Juan Cuatrecasas, tata di e alumno di e scol Gaztelueta cu a denuncia un docente fiho di Opus Dei, condena na diesun aña di prizon pa a abusa di su yiu.
Tambe lo t’ey presente den e reunion aki e Chileno Juan Cruz, cu durante su infancia tambe tabata victima di e pastoor sacerdote Fernando Karadima, segun confirma na EFE.
E reunion lo wordo celebra awe (diaranson) y den e reunion aki lo participa miembronan eligi door di e pontifice pa organisa e encuentro: e arsobispo di Chicago (Merca), Blase J. Cupich; arsobispo di Bombay, cardinal Oswald Gracias; e recien nombra secretario adhunto di e Congregacion di e centro di Proteccion di Menornan di e Universidad Pontificia Gregoriana y miembro di e Comision pa Proteccion di Menor, Hans Zollner.
Algun di e victimana di cual Vaticano no tabata kier a facilita ni number ni nomber pa proteha nan privacidad tambe lo participa den e reunionnan aki na Vaticano, unda cu ta calcula cu mas o menos 190 persona lo participa, pa caba cu e problema di abusonan di menor di parti di clero.
E reunion lo cuminsa cu algun video di e encuentronan cu e presidente di e Conferencia Episcopale a tene cu e victimanan den e dianan aki.