Durante e manifestacion cu a tuma luga diahuebs atardi, pueblo a sa di expresa cu nan ta cansa y harta cu tin asina tanto criminalidad cu ta asotando Aruba.
Despues cu nan a sali for di postkantoor, pasa den e cayanan di Oranjestad, e masa di ciudadano a finalisa dilanti di bestuurskantoor, caminda cu a entrega un manifiesto cu 13 punto di preocupacion na Minister Presidente Mike Eman.
Rene Bernabela, kende a bisti su pechi di ciudadano y formando parti di e comision Pro Siguridad y contra Criminalidad, a lesa e manifiesto pa despues entrega esaki den man di Prome Minister.
E manifiesto ta bisa como lo siguiente:
Considerando entre otro e maneho pa combati criminalidad di Gabinete Mike Eman a faya, sentido di insiguridad di nos hendenan a aumenta, tantisimo atraco tur dia, cantidad di arma di candela cu ta circula riba Aruba, aumento di asesinato cruel den nos comunidad, aumento di droga ilegal riba nos isla, tantisimo hortamento di auto, aumento di ilegalnan riba Aruba, ta urgi Gobierno pa declara di inmediato siguridad y combatimento di criminalidad, prioridad number 1 den e maneho di Gobierno.
Punto 2, e maneho di 0 Tolerancia contra di criminalidad y ilegalidad. Ta urgi Gobierno pa den un forma di emergencia pa polis bira visibel durante henter dia y anochi como un vigilancia permanente den tur bario aki na Aruba. Pa reactiva Warda nos Costa, pa reintroduci e helicopter, pa pone radar bek den funcion, pone e scanner tambe den funcion bek. Tene un razzia nacional pa saca tur arma di candela y arma blanco for di circulacion. Ta urgi Gobierno a corto plazo pa ta presente den e siman pa un plan concreto cu ta inclui lo siguiente:
1. Pa cuminsa cu un grupo pa studia pa bira polis y circula cu frecuencia defini, por ehempel anual, e siguiente gruponan cuminsa.
2. Entrega na Parlamento e asina yama nota di cambio riba presupuesto di 2017, unda mas fondo ta wordo destina pa e cartera di husticia.
3. Pa husticia, pa minister di Husticia responde na Parlamento con e ta bay gasta e placa of inverti esaki den e departamentonan concerni.
4. Pa e minister di asuntonan economico, minister di husticia y minister di finansas, atende cu APA y ASTEC riba tur cambio di control necesario na tur puerto di carga.
5. Inventarisa cua material falta pa cada cuerpo di siguridad por funciona mas optimal y efectivo, sigur na nos wafnan.
6. Fortifica un miho cooperacion entre Cuerponan di Siguridad, manera Cuerpo di Douane, IASA y Cuerpo Policial.
7. Saca tur persona ilegal for di Aruba pa medio di un razzia nacional intensivo.
8. Pa haci e departamento di IASA un Cuerpo pa medio di un instellingsbesluit y pasa e unidad di Warda nos Costa oficialmente bao di IASA.
9. Pidi asistencia tecnico na Koninklijke Marechausse pa IASA forma su cuerpo riba su mes independiente.
10. Siguridad Nacional di Aruba mester bira mas activo y bin cu siguransa pa duna entrenamento y aporta pa duna entrenamento na e departamentonan di siguridad.
11. Acerca Homeland Security Mericano staciona na aeropuerto pa ta disponibel. Duna entrenamento na e departamento di Imigracion, na Douane y Cuerpo Especial.
12. Cambia ley pa loke ta referi abuso di menor.
13. Haci tur ley necesario pa e siguridad di Aruba pa ta mas severo.
E manifiesto aki a wordo entrega na prome minister di Aruba, Mike Eman, kende a expresa cu e tin hopi respet pa e sentimentonan cu tin. Nos ta den un pais cu pa gobierno ta esencial pa tin siguridad, pa tur nos hendenan. Cada inkietud cu por tin riba e tema asina importante cu ta siguridad di nos pais, pa Gobierno ta mesun importante pa tin tambe.
Esaki ta un promesa cu ainda tin mas cu tin cu wordo haci pa percura pa tur hende na Aruba por tin e siguransa di siguridad, por sinti nan mes sigur tambe. Esey ta e compromiso di Gobierno, mescos cu nan a bin ta haci desde comienso, purba di mehora e calidad di bida di nos hendenan.
Minister Dowers ta bezig cu tur instancia cu tin un responsabilidad den esaki, ta trahando riba esaki y hunto, cu e forsa di un pueblo uni, semper ta logra mucho mas y esey sigur ta importante. No tin diferencia di opinion riba e tema aki.
Segun prome minister, e trabaonan mester wordo realisa di biaha. Desde cu nan ta den Gobierno, trahando riba bienestar di nos hendenan, treciendo mas entrada pa nos hendenan, ta un parti importante pa suavisa e dolor y retonan pa loke tin na Aruba y esaki sigur ta parti di e efectonan cu tin den un comunidad cu hunto tin cu percura pa tin e sentido di convivencia, tin un sentido di solidaridad y awe ta importante pa como Arubiano bin hunto pa expresa tambe cu ta importante pa nos mehora e area di Siguridad, prome minister a accentua.