Algun dia a pasa despues di e Marcha Nacional pa Nos Siguridad. Un biaha mas nos kier gradici henter e comunidad di Aruba cu a acudi masalmente pa uni e causa aki.
Hendenan opositor di e marcha, cu probablamente no ta preocupa cu e situacion di criminalidad cu nos ta biba aden, a malinforma cu e marcha tabata di 300 persona, mientras cu den su peak el a yega un 1900. Tambe, hende sin escrupulo a purba instiga nos hendenan pa no acudi na e marcha pasobra lo tin actonan di vandalismo y violento, sin conta cu a purba di pone un tinte politico p’e. Nos tur por a mira un grupo enorme di persona cu a comporta y a demostra cu nos ta hende decente, serio y cu un proposito comun: LOGRA UN ARUBA SIGUR pa nos tur. Toch segun diferente media, e marcha aki tabata esun mas grandi y miho organisa den HOPI tempo.
Nos tur a bin na un bon manera pa pidi Gobierno di Aruba cambia su prioridadnan. Lamentabel ta cu despues cu Gobierno di Aruba a firma un compromiso cu nos tur pa pone SIGURIDAD como PRIORIORIDAD, nan a sigui enfoca ariba otro asuntonan. Nos no ta bay elabora den e nombramento di Nos Gobernador, pero esaki a cautiva e atencion total di Gobierno sin cu tabata necesario.
Mientras tanto, niun di nos puntonan a wordo atendi y na lugar di esey, Minister di Husticia Arthur Dowers a subi avion.
Minister Dowers no mester duna MEP, ni niun sindicato un contesta, pero e mester para firme y responde pueblo cu e puntonan cu a wordo treci pa’dilanti.
Adhunto aki un copia di e manifiesto di Comision ProSiguridad, pa asina tur hende ta informa di loke a wordo pidi y e timeframe cu a wordo duna pa Gobierno di Aruba actua.
Despues di e marcha aki, caminda hende di tur condicion y color politico a mobilisa, Gobierno di Aruba no a tuma accion, loke ta demostra cu nan no ta tene na cuenta cu e peticionan di e ciudadanonan.
Un biaha mas Comision ProSiguridad ta urgi nos gobierno pa actua di manera responsabel y enfoca riba e crisis di insiguridad cu Aruba ta biba aden.