E ultimo desaroyonan pa loke ta referi autocriminaliteit ta alarmante. Tur dia nos isla ta confronta cu joyriding, ladronicia di piesa, daño y destruccion di auto. Ningun bario ta scapa di e actividad criminal aki.
E team di autocriminaliteit ta man yen cu tur e casonan cu ta drenta dia pa dia, aunke Cuerpo Policial tambe ta asisti e team aki, e trabou ta demasiado pa e cantidad di reporte cu ta drenta ora pa ora. Awo ta hasta haya auto kima, como tambe otro biaha, auto benta cant’i lama; cosnan cu nunca antes nos a yega di mira na nos dushi Aruba.
Na nos isla ta conta cu diferente grupo cu ta dedica na e actividad criminal aki y ta p’esey Comision ProSiguridad ta pidi Ministerio di Husticia concentra ariba e desmantelacion di e bandanan di malechor aki.
E antisocialnan aki, di manera sistematico, ta ataca nan victimanan. Tin ladronicia di auto, tin cu ta horta loke tin den auto y tambe esnan cu ta horta piesa, dus nos ciudadanonan no por scapa, di cualkier manera auto ta wordo pluma. E tipo di crimen aki tambe ta afecta nos turistanan, loke ta laga un imagen hopi negativo di nos pais atras.
Castigo mester wordo aumenta pa e delicuentenan y esnan cu ta coopera cu nan, ya cu manera nos a menciona prome, ta gruponan completo ta dedica na esaki. No solamente tin e ladronan, pero tambe esnan cu ta yuda bende loke nan ta horta.
Ministerio di Husticia mester bin cu cambio pa asina ora e casonan yega Ministerio Publico y dilanti di hues, e delincuentenan aki por haya e castigo mas severo cu tin.
E tipo di ladronicia aki tin un impacto hopi negativo den nos comunidad, ya cu e ta deteriora nos nivel di bida y e trankilidad di nos hendenan. Mayoria di biaha e tipo di crimen aki, relaciona cu auto, ta sosode na cas, loke ta laga un impresion traumatico den mente di e ciudadanonan.
Comision ProSiguridad ta basa su mes den e noticianan local, reporte y cifranan publicamente conoci, experiencia propio y testimonionan pa afirma cu na Aruba no tin siguridad pa auto, ni anochi ni den dia.
Esaki ta otro motivo pa uni e marcha nacional di dia 13 di October, corda cu ora pueblo uni… ora pueblo papia: CAMBIO MESTER BIN!
Ban hunto haci un yamado na Gobierno pasobra nos kier biba trankil den nos cas.