Comision ProSiguridad, memei di e situacion tristo y doloroso cu nos isla ta pasando aden pa via di criminalidad, ta hopi gradici cu pueblo di Aruba pa e reaccion positivo cu nos ta hayando pa loke ta referi Nos Marcha Nacional Contra Criminalidad. Finalmente tur hende a compronde cu nos accion ta un marcha no politico, pero algo enfoca specificamente ariba nos bienestar comun: SIGURIDAD NA ARUBA!
Nos a haya noticia hopi alentador caminda nos a wordo informa cu nos ta hayando steun di diferente individuo, organisacion y fundacion di influencia den nos comunidad.
Nos ta yama danki na Partido Democracia Real cu a scucha nos yamado. Agradecimento special tambe ta bay pa partido MEP cu a uni nos causa, como tambe palabra di gratitud pa e aporte di Parlamentario Marisol Tromp. Un danki hopi special tambe ta bay na e Fundacion Lisette Gomes cu ta uni na e marcha aki pa logra proteccion pa nos muchanan.
Aki nos ta mira cu nos por tin diferencia di opinion riba hopi topico, pero ora ta trata di nos siguridad, nos tur tin e mesun pensamento.
Awe nos kier pidi nos pueblo pa no perde speransa, pasobra un luz ta cerca. Nos sa cu nos manifestacion ta bay logra un cambio positivo den nos situacion.
Criminalidad ta un plaga cu ta complica y costoso pa combati, pa e motivo aki mester ta centro di atencion pa Gobierno. Criminalidad mester wordo considera como expresion di deterioracion social cu resultado riba nos ley penal.
Delincuencia mester wordo combati na corto plazo imponiendo castigonan severo y actuando cu determinacion. Mas mester wordo haci na mediano y largo plazo.
Nos di Comision ProSiguridad, mirando cu na Aruba e cifranan pa loke ta referi criminalidad ta aumentando, mirando e violencia hubenil cu nos tin y e abuso contra hende muhe, mucha y hende grandi, ta sigur cu nos hendenan ta yen di temor y kier mira un cambio awor.
Prome, nos comision ta kere cu nos Gobierno no a ripara na ora e limitacionan di nos husticia penal tradicional (polis, Ministerio Publico, etc) pa responde cu criminalidad. Di dos, un ayudo minimo a bay na e medidanan preventivo pa reduci e cantidad di criminal y victima cu insiguridad y criminalidad ta trece.
Siguridad publico ta di hopi influencia den e calidad di bida y den e desaroyo economico y social di nos comunidad. Criminalidad ta bay contra di mas inversion local y stranhero. Henter nos pueblo ta exigiendo mas siguridad publico. E siguridad aki mester wordo considera como un derecho cu tur institucion y e sociedad civil mester proteha y promove. E no por wordo laga solamente den man di Cuerpo Policial y husticia. Nos tur mester haci nos aporte.
Preveni e sensacion di insiguridad ta completamente otro cu preveni criminalidad. P’esey nos ta haci un yamado na nos Gobierno pa preveni criminalidad y na e mesun momento genera un sensacion di siguridad den nos pueblo. Un comunidad tin e necesidad di sinti su mes proteha y confia den e instancianan encarga cu nan siguridad.
Nos sistema ta trahando di manera represivo na luga di preventivo. Pero dicon ta asina importante pa preveni? Prevencion ta promove solidaridad, participacion di e ciudadanonan y e practica di un bon administracion publico. Prevencion ta fortalece nos institucionan democratico y un mayor responsabilidad di e servicionan publico, incluyendo polis y e sistema di husticia. Nos comision ta pidi Gobierno pa cuminsa preveni prome cu ta laat.
Un biaha mas nos ta yama danki na tur esnan cu a uni nos causa y ta extende e invitacion na tur gremio, organisacion y ciudadano pa haci di e oportunidad aki un herment pa logra accion di parti di nos gobierno.
Nos ta warda boso pa 4:00pm na Postkantoor, pa asina nos tur hunto bay Bestuurkantoor y logra e cambio cu nos ta desea: Nos kier biba trankil den nos cas!