Na Februari di aña 2019 lo tin e celebracion di e 60 aña di nos Grot di Lourdes cu ta situa na Weg Seroe Preto San Nicolas. Pa e conmemora e ocasion special aki ya e comision a cuminsa prepara y tin diferente proyectonan cu lo mester wordo completa prome cu Februari di otro aña.
Pero pa e proyectonan aki y un celebracion di e indole aki mas cu claro ta rekeri e fondonan necesario, pa es motibo aki Diasabra awor 3 di November conhuntamente cu Fast Tracks Mini Drag lo ta organisando e 2ndo edicion di Ban Topa. Un anochi pa henter famia unda grandi y chikito lo tin algo di haci na e facilidadnan di Fast Tracks cu ta keda na cas di Faustin y Chela Geerman riba e caminda pa prome cu bo yega Palo Marga. E biaha aki un biaha mas lo bay tin e popular vlooienmarkt cu articulonan cuminsando for di solamente 1 florin, lo bay tin mata, bolo, articulonan di Pasco como tambe tambe lo bay tin un kids corner specialmente pa entretene tur e muchanan, pa e amantenan di mini drag lo bay tin caredanan interesante y tambe henter e evento lo wordo anima pa musica en bibo.
Tur tur e fondonan recauda durante e actividad aki lo bay 100% pa e comision di Grot di Lourdes pa asina por sigui traha y prepara pa e gran celebracion di e 60 aña di e Grot di Lourdes. Pues e invitacion ta pa Diasabra awor di 6or di atardi pa 10or di anochi Ban Topa na Weg Fontein 140 cu henter famia y contribui na un noble causa.