BRUSELAS, Belgica- Diaranson e Comision Europeo (CE) a impone un boet di mas di 4 miyon euro na Google. Esaki ta pa e uzo di e sistema operativo Android pa reforsa e posicion di dominio di buscado, e sancion mas grandi pa incumplimento di e normanan di e Competencia nunca antes imponi door di Bruselas.
“Google a haci uzo di Android como un vehiculo pa consolida e dominio di su motor di buskeda. E practicanan aki a nenga su rivalnan e oportunidad di innova y competi pa e meritonan. Nan a nenga e consumidornan Europeo e beneficio di un competencia efectivo”, segun e comisario di e Competencia, Margrethe Vestager.
E multinacional Mericano ta exigi e fabricantenan di telefonnan celular cu tin e sistema operativo Android e instalacion pa defecto di cierto aplicacionnan manera Google Search of e browser Chrome.
E Comision Europeo a cumpli cu su menasa y a impone un boet historico na e multinacional Google pa abuso di posicion dominante a trabes di Android. E boet ta di 4.340 miyon euro, cu ta 4,5% di su balor ariba mercado.
Di su parti, un vocero di Google a anuncia cu e lo recurri na e sentencia di e Comision. “Android a crea mas opcion pa tur hende, no menos. Un ecosistema pujante, innovacionnan rapido y prijsnan mas abao ta clasiconan distintivo di un competencia fuerte”.
Segun Reuters, e boet tabata prepara caba siman pasa pero e Ehecutivo comunitario a dicidi di retrasa esaki en coneccion cu e bishita di e presidente Mericano, Donald Trump, pa acudi na e cumbre di lidernan di NATO.