E siman aki e Comision Parmanente di Parlamento encarga cu asuntonan referente companianan estatal tabata tin un reunion cu representantenan di CITGO Aruba.
Parlamentario Andin Bikker ta pa casi 8 aňa presidente di e comision encarga cu companianan estatal, bow cual awor entre otro e Refineria di Aruba N.V. (RDA) ta resorta. Parlamentario Bikker a recorda cu ta su mocion a pone cu a instala un comishon pa explora e re-apertura di e refineria, ya cu Gobierno a expresa e tempo ey di tin intencion pa bay desmantela e facilidadnan.
Banco Central recientemente a saca un rapport unda cu basicamente ta bisa cu e crecemento economico premira pa aña 2017 ta grandemente basa riba e inversionnan den reconditiona e refineria pa su re-apertura. E situacion aki ta pone cu Parlamento for di punto di bista di e presupuesto di pais Aruba tin e deber y obligacion di basicamente monitor con un inversion asina grandi y importante pa pais Aruba ta canando. A base di esey Andin a dicidi di invita RDA y CITGO pa reuni cu e Comishon pa asina por haya mas informacion.
Segun Parlamentario Bikker un par di siman pasa e Comishon a reuni cu Refineria di Aruba N.V. y dialuna ultimo a reuni cu CITGO. E Parlamentarionan di diferente fraccion cu tabata presente a haci diferente preguntanan y cu por bisa den liñanan grandi cosnan ta cana segun e plannan calcula. Presidente di e Comision, mr. Andin Bikker ta kere cu si mas despues mester mas informacion lo invita RDA of CITGO un biaha mas. Sinembargo na e momentonan aki lo bay pidi un reunion cu Gobierno mirando cu siman pasa por a tuma nota cu cierto acuerdonan a wordo firma y como Parlamentario tin e derecho pa haya informacion for di Gobierno mes, ya cu Parlamento su tarea principal ta pa controla Gobierno.