E tratado Internacional di Derecho di mucha ta encera diferente articulo cu tin como meta pa e mucha por crece den un ambiente sigur y asina desaroya su mes na su maximo potencial. Den a comunicado aki Comision Derecho di Mucha kier duna atencion na e derecho di e mucha pa wordo scucha.
Den hopi circumstancia adultonan ta responsabel pa tuma decision pa e mucha. Den e tratado ta pone atencion cu apesar cu ta keda e responsabilidad legal di e adulto pa tuma desicion pa e mucha, e mucha aki tin derecho pa bisa loke mester sosode ora cu e adulto ta tuma desicionnan cu ta afect’e. Su opinion mester wordo tuma den consideracion.
Muchanan tin derecho pa ricibi y comparti informacion, mientras cu e informacion aki no ta ocasiona daño na nan of otro persona. Muchanan tin derecho pa pensa y kere loke nan ta desea, tambe pa expresa su mes spiritualmente, tanten cu nan no ta strobe otro personanan di disfruta di nan derechonan. Segun e tratado, mayornan mester guianan yiunan pa por haci esaki.
Muchanan tambe tin derecho pa reuni cu otro y forma grupo y organisacionnan, tanten cu nan no ta stroba otro persona di disfruta di nan derechonan. Mescos cu nan tambe tin derecho, di otro banda, riba privacidad. Ley lo mester proteha nan di atake contra nan manera di biba, nan bon nomber, di nan famia y nan hogar.
Pa mas informacion encuanto e Tratado di Derecho di Mucha, comunica cu e Comision Derecho di Mucha na [email protected].