Gobierno di Aruba conhuntamente cu Comision Celebracion Dianan Nacional (CCDN) ta informa y alabes invita henter e pueblo di Aruba pa hunto nos ban celebra den grandi nos Dia Nacional di Himno y Bandera.
Luna di maart ta nos luna cultural y esaki no por pasa sin mas. CCDN ta aportando grandemente den diferente di e actividadnan cu lo tuma luga rond di nos Dia Nacional. Manera ta un custumber caba nos hobennan di scolnan basico ta haya e oportunidad di competi den nos competencia di pintura escolar cu e aña aki ta hiba e tema di ‘Nos Himno’. Un tema basta amplio caminda e muchanan por pinta riba e coupletnan di e himno, como tambe di e autornan di nos himno y asina ilustra loke ta inspira nan ora nan scucha nos himno nacional ‘Aruba Dushi Tera’.
Un luna cultural sin bon musica ta casi imposibel. P’esey mes riba dia 10, 11 y 12 di Maart venidero pa 7’or di anochi riba Plaza Libertador G.F. (Betico) Croes ta bay tin e Festival Un Canto Pa Aruba y Comision Promove Cultura ta cuminsa esaki cu e prome dos anochi cu lo ta pa nos chikitin y hobennan. Riba e ultimo anochi nos tin esun di adultonan bou di encargo di Fundacion Cultural Di Festival Folklorico. Esaki ta priminti un biaha mas di bira un exito total, mirando cu ta bay tin diferente tentnan cu cumindanan crioyo, pasa boca y nos cosnan dushi no por falta. Hunto cu esakinan un bar bon surti y sin lag’ afo nos artesanonan cu tambe lo t’ey presente cu nan obranan di man y tipico.
Despues di un weekend yena cu e ambiente musical nos ta pasa pa un ambiente un poco mas relaha. Esaki nos por experiencia cu e anochi di Poeta di Patria, caminda diferente Poeta lo competi declamando nan poema, e tema di e aña aki ta: “Grandesa di bo pueblo, ta su gran cordialidad”. Poeta di Patria lo tuma luga na Fort Zoutman riba dia 15 di Maart 2017 pa 6’or di atardi.
Nos dia nacional no lo por ta posibel sin e 2147 firmantenan cu riba un 18 di Maart a firma y asina por a cuminsa cu e lucha pa nos Status Aparte, riba dia 16 di Maart 2017 pa 7’or di anochi na Plaza Monumento 18 di Maart nos lo rindi cada un di e firmantenan y nan famia, nos mas sincero respet cu un ceremonia protocolar, y ofrenda floral como tambe un poco di musica y baile. Bini hunto cu nos y disfruta di un anochi yena cu memorianan bunita di e comienso di nos Status Aparte.
Ata nos na porta di un otro fin di siman di celebracion, esta diabierna riba 17 di Maart 2017 pa 7’or di anochi riba Plaza Padu, Juan Chabaya Lampe (net patras di Bestuurskantoor) nos ta cuminsa cu un tremendo manifestacion cultural, un poco prome cu esaki lo tuma luga e desvelo di e estatua di nos tata di cultura esta Juan Chabaya ‘Padu’ Lampe. E anochi aki lo ta uno grandi, caminda diferente artistanan local lo presenta durante anochi aki, tanto cantando, declamando y bailando.
Carlos Bislik hunto cu su orkesta lo ta un di e gran musiconan di e anochi aki y for di exterior nos lo tin e presencia di e famoso pianista Argentino Sr. Raul di Blasio cu lo duna homenahe na Padu y alabes deleita tur presente cu su musica. E anochi aki lo bira uno unico y sigur memorabel pa hopi di nos. Durante anochi aki tambe ta bay tin diferente tent cu cuminda, pasa boca, cos dushi y un bar bon surti. Diferente otro luga lo ta habri, entre nan e tienda ‘Cosecha’ hunto cu Fort Zoutman, caminda lo ta exponiendo e miho pinturanan di e Competencia Escolar di Pintura di e aña aki. E tienda ‘Cosecha’ tambe lo ta promoviendo y exponiendo tur e obranan di nos artesanonan local y certifica cu e Seyo di Artesania. Den Fort Zoutman lo tin un ‘Mini Bon Bini Festival’ p’asina tur cu ta eybanda por mira loke tin tur diamars y cu nan ta ofrece nos bishitantenan.
Un poco mas laat den anochi riba Plaza Daniel Leo lo cuminsa e parti pa nos hobennan, esaki ta bou encargo di Sr. Michael Lampe y su Crew. Un di e artistanan cu lo presenta e anochi aki ta nos super talentoso hoben Jonathan Thiel, kende lo presenta un concierto dedica na Padu. Pero esaki no ta tur, mirando e gran exito di tur diabierna na D’jispie. Eynan lo bay tin pantayanan p’asina tur hende den e bisindario di Caya Grandi por mira tur loke ta andando riba Plaza Padu y asina disfruta hunto cu nos e gran anochi cultural aki.
Y mas cu claro nos no por laga afo nos Aubade y nos Desfile di e gruponan uniforma cu lo pasa riba Vondellaan riba dia 18 di Maart 2017. E ceremonia protocolar lo cuminsa pa 9’or di mainta, e aña aki esaki lo tuma luga na Plaza Gilberto F. (Betico) Croes, na unda tur mandatario y pueblo en general lo por disfruta di un mainta sumamente ameno cu canto, baile y mas cu claro nos famoso desfile di e gruponan uniforma. E mainta aki nos lo tin diferente coro bou direccion di Sra. Maybeline Arends – Croes cu pa varios aña caba a sa di deleita tur presente cu cancionnan bunita dedica na nos Himno y Bandera.
Despues di a disfruta di tur e gruponan uniforma, nos por sigui keiro den famia pa bishita e diferente centronan di bario, museonan, clubnan di deporte etc. Y asina celebra nos dia nacional como nos fiesta nacional.
Arubianonan y esnan residencia aki na Aruba ban uni hunto y celebra nos dia nacional di Himno y Bandera den grandi. Di parti di Gobierno di Aruba hunto cu Comision Celebracion Dianan Nacional (CCDN) di awor caba ta desea henter pueblo di Aruba un feliz luna cultural y un feliz Dia di Himno y Bandera.