Comision Asuntonan di Reino di Tweede Kamer a bishita Arubahuis

DEN HAAG  – E staf di e Comision Permanente pa Asuntonan di Reino di Tweede Kamer a haci un bishita di cortesia na Arubahuis. E delegacion a consisti di Griffier Tim de Lange, adjunct-griffier Annemarijke de Vos, informatiespecialist Kim van Velzen, commissie-assistent Djamila Khodabaks y kenniscoördinator Jacob Pot. Esaki ta pa prome biaha cu e staf completo di e Comision di Tweede Kamer ta haci un bishita na Arubahuis.

E delegacion a keda ricibi den Sala Betico pa director a.i. mr. Glenn Ling, Representante di Aruba na Union Europeo y alabes Minister Plenipotenciario Suplente Eddy Paris, coordinador di departamento di Enseñansa di Arubahuis James van der Linde, coordinador di e departamento di Bienestar General y Cultura Nuris Dabian y PR di Arubahuis Sidney Kock.

Sr. Ling a yama e delegacion bon bini y a elabora riba e tarea di Arubahuis cu primordial ta pa duna sosten na e Minister Plenipotenciario den su funcion. Tambe ela bisa cu den vision di Minister Plenipotenciario Guillfred Besaril Arubahuis mester bira un organisacion menos administrativo y mester brinda mas servicio na e comunidad Arubano na Hulanda. Parti di e vision aki ta e proceso na reorganisa Arubahuis, segun sr. Ling.

Eddy Paris den su calidad como representante di Aruba na Union Europeo a papia tocante di su funcion den OCTA, cu ta consisti di 25 pais of territorio cu tin un relacion cu Union Europeo pa medio di nan relacion estatal cu cuater pais miembro di Union Europeo, den e caso aki Dinamarka, Francia, Reino Hulandes y Reinadonan Uni. Den cuadro di esaki sr. Paris a menciona algun proyectonan na Aruba cu ta ricibi subsidio di Union Europeo manera ta e caso pa cu un facultad nobo pa Universidad di Aruba. Tambe ultimo añanan tin hopi studiante di Aruba cu ta haci uso di e programa di intercambio Erasmus, cu tambe ta wordo financia door di Union Europeo.

 

Como coordinador Bienestar General y Cultura Nuris Dabian a ilustra e problematico cu Arubanonan ta encontra aki na Hulanda. Sra. Dabian pa pidi atencion special pa e grupo di studiantenan cu ta bin Hulanda pa sigi un estudio riba nivel di MBO y ta haya nan den hopi problema cu vivienda y financiamento di nan estudio.

James van der Linde, como coordinador Enseñansa a bisa cu na contrali cu e studiantenan di MBO, Arubahuis tin e mandato pa brinda sosten unicamente na studiantenan cu un Arubalening. Y esakinan ta studiantenan cu ta sigi un educacion halto na un Hogeschool of Universidad. Segun James esey no ta kita afo cu Arubahuis na e momento cu un studiante sea ta MBO of a bin studia riba su mes, asina yama “Free Movers”  tuma contacto cu Arubahuis ta brinda nan e ayudo unda cu por of conseho nesesario pa nan sigi nan caminda aki na Hulanda.

 

Tim de Lange a duna un splicacion con e Comision pa Asuntonan di Reino ta funciona. Nan tarea principal ta pa duna sosten ambtelijk na e miembronan di e comision. Sr. De Lange a bisa di ta mira e bishita aki como uno pa profundisa e lasona entre e comision y Arubahuis.

 

Sin mas un encuentro ameno cu sigur lo marca un cooperacion nobo entre Arubahuis y e Comision Permanente pa Asuntonan di Reino di Tweede Kamer.

 

Comments

comments