Comision Accion Femenino di (MEP) cunan prome actividad pa empodera e hende muher pa aña 2019

Dia 26 di mei lo tin e prome charla “BO SALUD TAMBE TA IMPORTANTE!”

Recientemente a tuma lugar eleccion pa Directiva nobo di MEP pa 2019-2021. Shailiny
Tromp-Lee a keda nombra Comisario y ta encarga cu Comision Accion Femenino. Desde cu
el a asumi e encargo sra. Tromp-Lee a presenta na Directiva 3 punto cu e lo kier bay
concentra riba nan pa aña 2019. E 3 puntonan ta:
1. Empodera e hende muher
Bin cu charla/workshop pa empodera e hende muhernan den e organisacion di MEP y di
Aruba en general. No solamente riba tereno profesional pero tambe como persona, pareha, mama etc. Lo pone accento ariba e.o.: liderazgo banda di bida familiar, salud, motivacion y baloracion, etiketa y protocol.
2. Incentiva mas hende muher pa drenta politica
Pa mas hende muher bira curioso of evalua cu seriedad nan interes pa drenta politica. Lo crea momentonan pa socialisa y intercambia entre esnan interesa y politiconan femenino actual y di antes cu ta aparece of a aparece riba lista di MEP. Alabes lo enfatisa ariba e ‘reconocemento di poder’ di e hende muher den politica of den cualkier otro funcion caminda nan por forma parti di e nucleo di sosten directo di un partido politico.

Lo bay crea anochinan social pa dialoga y visiona ariba topiconan manera: discusion na
nivel/profesionalismo, importancia di liderazgo (hende muher) y inequality is the greatest
equality that you can get: sea bo mes! Aprecia diferencia (educacion/habilidad).
3. Aporta y engrandece nos hala femenino Grace Bareño
Pa por realisa un programa pa e periodo cu e ta encarga cu ne, Tromp-Lee a dicidi di busca miembronan pa e Comision Accion Femenino y ta contento cu a logra forma un comision cu yen di animo y gana pa traha ariba diferente actividad pa e hende muhernan aki na Aruba.
Siguiente personanan ta forma parti di e comision: Gossy-ann Oduber, Verenuska Rincon, Stephanie Croes, Darlaine Guedez-Erasmus y Marlene Lampe (no ta ariba e potret).

Pa aña 2019 e meta ta pa organisa 4 actividad dirigi ariba e punto di empoderacion di e hende
muher. E prome actividad di Comision Accion Femenino lo tuma lugar dia 26 di mei
proximo na Cede di MEP na St.Cruz di 5:30-7:30 pm. Un charla cu tin como topico “Bo
salud tambe ta importante!”. Hopi biaha como hende muher/Mama nos ta percura pa full e famia y ta lubida ariba nos mes. Ignorando e realidad cu nos salud mester ta bon pa nos por cuida di otro. P’esey a organisa e charla aki caminda a invita dr. Dora Tabares cu lo papia di importancia di chekeo general, pap test etc., alabes a invita Stichting BOB cu lo presenta nan organisacion y e importancia di control di nos pechonan y nos ta termina cu un presentacion di WGK caminda un nutricionista lo papia di e importancia di un bon nutricion. Despues di cada presentacion lo tin oportunidad pa haci pregunta y ambos organisacion lo tin un mesa pa duna informacion.
Comision Accion Femenino di MEP ta invita pueblo en general y ta spera di por yama boso bon bini dia 26 di mei na Cede di MEP.

 

 

Comments

comments