Tur hende cu kier yuda ta bon bini pero ta sinti cu no tur gremio ta para banda di e comercio den centro di Oranjestad. Señora Tatiana Eman ta amplia mas ariba esaki.
Segun Sra. Eman, su persona a bin cu e idea ey ariba su mes, e no ta afilia na ningun partido politico. E idea ta nace for di e propio necesidad y e necesidad cu el a mira den su propio coleganan.
Aña pasa a reuni cu Camara di Comercio, unda nan tabata tin diferente reunion unda cu e mustra diferente cifranan. Ta papia akinan di cifra, ta papia di placa y no di emocion. Camara di Comercio, pa cualkier persona interesa, tin tur informacion di e comerciantenan den Caya Betico Croes, caminda cu comerciantenan a mustra e diferencia di benta, prome cu parkeermeter a wordo implementa y despues, unda cu a mustra cu e caida tabata dramatico.
No ta papiando di percepcion, pero di cifra. Sra. ta kere cu si tin un hende, un organisacion cu por yuda e comerciantenan, nan ta mas cu welcome. Otro punto ta tambe, nan por tuma contacto libremente cu Señora Eman. E lo ta mas cu contento pa splica kico tur e iniciativanan, paso nan no ta trece solamente e problemanan padilanti, nan a trece tambe diferente solucion. Pero si no tin oido, mes leu nan a keda.
Comerciantenan a wordo priminti, cu Caya Grandi lo haya wi-fi, security, camaranan, comerciantenan a wordo priminti cu Caya Betico Croes lo haya sun shades, pero ainda nada. Ainda nan mester kere? Esaki no ta un atake personal. Nan no ta atacando niun hende. Tin un gobierno na mando. Si nan tin un preocupacion, unda nan mester bay? Un ta na gobierno? Asina Sra. Tatiana Eman a splica.