Diabierna tabatin un conferencia di prensa, caminda cu presidente di Comerciante Uni Aruba (CUA), Frans Ponson, a expresa su preocupacion profundo p’e practicanan inhusto y e proteccion di gobierno cu ta faborece SETAR, e empresa di telecomunicacion di Aruba. Ponson a haci un yamada urgente na Aruba Fairtrade Authority p’e interveni y regula e situacionnan aki di desigualdad riba mercado.
Ponson a cuminsa cu e conferencia destacando e mision di Aruba Fairtrade Authority, un entidad encarga di proteha e consumidornan y garantisa cu e empresanan no abusa di su posicio di poder. El a splica cu e autoridad aki a wordo estableci pa sigura cu ningun empresa, sin importa su tamaño, por domina e mercado di manera inhusto y perhudicial pa comunidad.
“Un empresa no por abusa di su poder den comunidad, ya cu si e ta demasiado grandi, e por causa problema. Esaki ta algo cu mester ta controla y no ta negativo pa comunidad, sino tur lo contrario, ta loke cu Ponson a enfatisa.
Proteccion gubernamental di SETAR
Ponson a enfoca gran parti di su denuncia riba SETAR, e empresa estatal cu actualmente ta doño di TeleAruba y Cable TV y cu a adkiri e empresa grandi di IT, ITP Caribbean. Segun Ponson, SETAR tambe ta invirtiendo den camara di siguridad y cumprando accion den ciber siguridad, beneficiando di un evidente falta di competencia riba mercado Arubano.
“Digicel no por instala su kabel di internet na Aruba y Starlink no por opera sin un permiso. Esey ta impedi cualkier competencia real contra SETAR, segun Ponson. E resultado ta cu SETAR, protehi pa gobierno, por gana hopi mas placa y uza e fondonan ey pa cumpra otro empresa local, loke ta profundamente inhusto.
Ponson a trece e pregunta di con un empresa Arubiano chikito por competi cu un entidad asina grandi y protehi. El a señala cu e informe fnanciero di 2018 a mustra cu gobiero a ricibi 7.5 miyon florin na divident di SETAR, loke ta indica un conflicto di interes bon cla.
Regulacion y conflicto di interes
Gobierno ta regula prijs por ehempel riba panaderia, stacion di gasolin y supermercado pa proteha e consumidor. E ora unda e reglanan di prijs di SETAR ta p’e pueblo?, ta loke cu Ponson ta cuestiona. Internet ya no ta un luho, sino un necesidad, specialmente p’e muchanan cu ta bay scol. Sinembargo gobierno no ta regula e prijsnan di internet pasobra e mester di e dividendonan di SETAR.
Ponson a adverti cu si SETAR sigui cumpra empresa sin competencia, e otro empresanan publico manera NV ELMAR por sigui su ehempel y monopolisa e servicionan esencial, loke ta inhusto y contrario n’e principionan di bon gobernacion.
Impacto den sector priva
E impacto di e practicanan ihusto aki no ta limita na SETAR. Ponson tambe a critica e subsidio di gobierno na postkantoor, cu ta competi inhustamente contra e empresanan local manera FedEx, UPS y Bon Bini Cargo. “Nos, e comercintenan, ta financiando postkantoor p’e competi contra nos mes. Esey mester stop,” el a afirma.
Yamada na accion
Finalmente, Ponson a haci un yamada na Aruba Fairtrade Authority p’e investiga y regula e practicanan aki dentro di gobierno prome cu impone regla den e sector priva. “Si SETAR kier cumpra empresa, e mercado mester habri pa tur por competi cu e mesun condicionnan. Nos mester di un regulacion husto y transparente pa proteha e consumidornan y sigura un competencia igual na Aruba,” el a conclui.
E conferencia di prensa di CUA a pone di manifiesto e preocupacionnan profundo di e comerciantenan Arubiano riba e practicanan inhusto y e necesidad urgente di intervencion y regulacion di parti di Aruba Fairtrade Authority.
