Comerciante Uni pa medio di e comunicado aki ta expresa su sosten na e Gobierno y Minister President Sra. Evelyn Wever-Croes cu firmamento di e acuerdo historico entre pais Aruba y Hulanda.
Den diferente conferencia di prensa y comunicado a urgi Gobierno di Aruba pa yega na un acuerdo cu Hulanda lo mas pronto posibel pa loke ta pakete di ayudo financiero y di reforma.
Nos ciudadanonan, cu ya ta yegando na e limite di nan recursonan financiero di reserva di placa y nan patrimonio personal, por mira padilanti na un futuro cu ta conta cu e sosten financiero y knowhow di un di e paisnan mas desaroya economicamente y institucionalmente na Mundo. Placa ta cabando cu hopi di nos. A yega e limite.
Hulanda ta un ehemplo di sostenibilidad y productividad, di cual nos mester ta un parti integral di dje. No por hustifica cu nos como ciudadano di Reino Hulandes ta biba na un nivel di bida cu ta hopi mas abou cu nos paisanonan na tera friu.
Nos pais tin mester di un periodo di sosten financiero stabiel y sigur, sin efectonan di rating ariba interes, compaña cu cambionan structural den gasto di Gobierno, cu e ultimo tres decada a bin ta come den e poder di compra di e ciudadano den forma di mas impuesto y mas burocracia. Esaki a haci nos costo di bida asina halto den añanan, cu awor nos florin, cambia na dollar Mericano of na Euro, ta bal hopi mas den exterior cu na Aruba mes.
Nos tur ta literalmente mas pober bibando den nos propio pais pasobra nos pueblo, comercio y turista mester carga e peso enorme di un aparato di Gobierno cu ta mucho grandi, mucho costoso, y cu ta brinda servicionan cu ta abou di e normanan cu un ciudadano Hulandes y cu tur Rubianonan tin derecho ariba dje y merece.
Laga nos saca bon probecho di e sosten aki, implementando reformanan cu lo alivia e peso den cartera di e ciudadano, mehora e servicionan di Gobierno, drecha clima di inversion pa comerciantenan y duna e ciudadano un servicio di Gobierno sin discrimina na fabor di simpatisante di partido den Gobierno.
Hecho cu nos a mal custuma cune desde prome y despues di Status Aparte. Esaki ta loke a hiba varios pais den nos region na subdesaroyo, pobresa y corupcion. Ta spera cu tur vacatura den e aparato di Gobierno, cu ta necesario, bay cu un plan aproba di formacion den nos presupuesto nacional, debati y hustifica publicamente den Parlamento.
Cu ta pone personeelsplan publicamente ariba website di Gobierno y cu tur hende cu e talento, conocemento y experiencia por solicita pa esaki y competi cu otro a base di nan capacidad y merito, den forma publico y notorio. Ban saca nepotismo y patronahe for di nos sistema y cultura politico y Gobierno.
Laga nos scoge e miho yiunan di tera of expertonan den exterior (si na Aruba no tin) pa duna servicio na henter e pueblo, y no solamente nombra esun cu a campaña pa partido.
Ban laga hefenan di departamento maneha esakinan den forma autonomo y carga nan responsabilidad pa bon servicio, cu neutralidad y integridad, cu control di audit y spot checks, y ‘mystery shopper’ pa controla, midi y vigila calidad. Y ora hefe nan aplica reglanan di disciplina pa sostene calidad nan no ser yama bek y persigui pa politica.
Ta di spera tambe cu represaya y boycott pa esunnan cu expresa nan punto di bista publicamente, ora cu nan ta diferente cu Gobierno, tambe pronto pasa pa pasado cu e cambionan cu ta bin. Rabia y ataca personalmente esun nan cu tin un opinion obhetivo diferente ta un mentalidad cu ta tera fertil pa abuso di poder, censura personal y corupcion florece.
E fondonan cu lo bin disponibel for di Hulanda lo sostene nos sistema educativo, infrastructura, husticia y estado di derecho. Nos mester di dje urgentemente. E acuerdo aki ta un oportunidad sin precedente pa nos futuro y un speransa pa henter un pueblo di e isla aki pa move pa un nivel mas halto den su desaroyo socio economico.