COLE BAY, St. Maarten – Diasabra anochi laat, un homber identifica pa su famianan di mas cerca como Kendrick Allen Landsmark (42), naci na Aruba, un residente y comerciante di Cole Bay, a wordo secuestra pa personanan desconoci.
Landsmark tabata na cas cu su pareha ora cu un yamada a drenta y un persona desconoci a wordo mira pafo ta ward’e. El a bandona e cas cu e persona y nunca el a bin bek.
Riba diadomingo, dia 6 di November, famianan a cuminsa cu un buskeda y a nota cu Landsmark a bishita su oficina. E oficina tabata un desaster. Di acuerdo cu un famia, tabata mescos cu un hende tabata buscando algo.
Riba diadomingo anochi, di acuerdo cu fuentenan confiabel, autoridadnan Frances a haya un curpa sin bida. 721news no por a confirma e sitio exacto na parti Frances, sinembargo, The Herald a reporta cu el a wordo haya den e area di Plum Bay.
Autoridadnan di e banda Hulandes a wordo notifica riba e hayasgo y un team di investigado a bishita e cas di Landsmark na Colebay.
Famianan a bay na autoridad di e banda Frances pa mas informacion. Ningun declaracion oficial a wordo haci door di autoridadnan Frances of Hulandes riba e secuestro y asesinato di Landsmark.
Fuente: 721News