Hubert Dirksz ta un comerciante cu ta forma parti di e comision Pro Siguridad y tabata sumamente contento y satisfecho cu e marcha contra criminalidad.
El a splica cu el a bisa caba na radio mas tempran cu si e por haya mil hende mes manifesta pa duna gobierno e mensahe aki, nan lo keda contento. Por a mira cu e sosten tabata tey y e marcha tabata un exito.
Despues di awe kico?
Dirksz a splica cu si pueblo no a manifesta, e pueblo a bisa cu ta contento cu e situacion, e asunto lo keda status quo. Pero awor cu nan a mustra cu nan kier bisa Gobierno cu nan kier cambio den prioridad y maneho, e comision, por medio di carta of tur manera di comunicacion, bisa Gobierno pa cumpli cu e mandato y cumpli cu e deseo di su pueblo. Gobierno ta di pueblo y ta su pueblo cu nan no kier otro cos. Nan kier siguridad, nan kier trankilidad, nan kier paz.
Tin placa disponibel?
Dirksz a sigui splica cu den e puntonan cu tin urgente, ta bisa cu si minister di husticia pidi minister di finansas 10 miyon extra pa combati criminalidad, dun’e. Awor si otronan mester haya menos, ta haya menos. Polis mester haya loke e tin mester. No tin escusa mas pasobra tempo pa duna otro hende culpa, ta pasado.
Union
Ta wordo menciona cu no tin mucho union entre e departamentonan di polis, kustwacht, douane, etc.
Dirksz tin di compronde cu e team ta hopi dividi. Si e cabes ta dividi, e curpa tambe ta dividi. E ministernan mester bira uno y door cu ministernan bira uno, nan ta haya tambe cu e cabesnan di departamento lo bira uno y asina so nan por combati criminalidad. Un pueblo dividi ta wordo venci, segun Hubert Dirksz.