Despues di a completa su periodo di 3 añanan como miembro di e hunta di directiva di Camara di Comercio di Aruba, e comerciante, Alexlindy Croes, mihor conosi como Lindy, a despedi di e hunta pa asina traha espacio pa otro comerciante haya e oportunidad pa sirbi comercio di Aruba y pa di otro banda e por enfoca riba su negoshinan.
Lindy Croes no ta un persona desconoci den comunidad di Aruba y den comercio. Lindy ta propietario di Lindy (Lifestyle) Boutique cu a habri su portanan 4 aña pasa centro di Oranjestad. E tempo ey e tabata e motor tras di varios actividad grandi pa stimula comercio den caya principal, tabata e creador di e lema “Let’s Make Caya Grandi Great Again” y tabata e creador di e eventonan di “Ambient’i Fin di aña cu tawata trese miles di hende den nos centro commercial, y tambe pa un tempo corto tawata representa nos Minister President, Evelyn Wever-Croes den Caya Betico Croes.
“No tabata tin un miho manera pa inicia mi carera como comerciante” asina Lindy a declara; E experiencia di a forma parti di Camara di Comercio a habri su wowo den hopi aspecto. Aunke Lindy a caba su estudio den Bsc. Business Management & Information Systems algun aña atras, ta cu e experiencia cu ela haya den Camara di Comercio y como tanto den su mes un negoshi ela bin realisa cu academia ni tampoco e systemanan den nos pais ta prepara bo pa e bida real di negoshi.
Lindy ta splica cu 2020 tabata un aña sumamente duro y doloroso pa hopi, y di otro banda e tabata tambe revolucionario pa esunnan cu a sigui pusha. “Na ningun momento nos por a pensa cu den un economia cu tabata draai exitosamente manera esun di Aruba, y sigur cu un sector di turismo floreciente, cu den un cera di wowo nos a bira un pais cu mester a dal porta cera y yega na 0 entrada pa mayoria di nos ciudadanonan den e sector priva. E normal nobo a bira sinonimo na un comienso nobo den comercio y ta parce cu un di e efectonan di e pandemia tabata un “reset button” cu no ta discrimina. Hopi negoshi a cera, hopi a transforma, y tin un chens sumamente grandi cu hopi mas lo bay cera. Esey ta e realidad actualmente den comercio y esaki ta un situacion real y preocupante cu lamentablemente ainda no ta e topico di dia pero cu mester wordo poni riba e mesa di discusion pronto entre comercio y gobierno”, sra. Croes ta menciona.
“Cu mi salida di Camara di Comercio y entrada di e miembronan nobo, mi tin tur confiansa cu Camara di Comercio lo sigui lucha pa nos derechonan y ta un bos pa nos como comerciantenan.
Mi ta spera cu durante e añanan cu mi a sirbi mi comunidad boluntariamente den Camara di Comercio, mi a haci boso orguyoso y mi kier a gradici tur esunnan cu a kere den mi desde e inicio.
Tambe mi kier a gradici tur e miembronan di e hunta di Camara di Comercio, gobernantenan y prensa cu semper a scucha mi puntonan cu a wordo treci dilanti como e bos di nos negoshinan chikito, of tambe conosi como e termino “young entrepreneurs”, aki na Aruba.” Tabata declaracion di Lindy.
Lindy Croes ta vocifera su mes cu ta mas cu claro cu e lo kier forma parti un biaha mas di Camara di Comercio mas den futuro, y tambe di un manera of otro forma parti di nos Gobierno aki na Aruba ya cu passion ta mira e pueblo y comerciantenan di Aruba engrandece nan mes, y lo desea di representa e comercio henter den un forma mas grandi.