Comandante Jan Ten Hove di Marinierskazerne a yega na final di su periodo di encargo na marinierskzerne na Savaneta. Su ultimo reunion cu Prome Minister Mike Eman e comandante saliente tabata compaña pa su sucesor comandante Timon van Dishoeck.
Timon van Dishoeck, Luitenant Colonel ter Mariniers, a yega Aruba dia 21 di Juni ultimo hunto cu su famia y inmediatamente a cuminsa cu preparacion pa su trabou na Marinierskazerne. Durante un entrevista despues di a reuni cu Prome Minster di Aruba el a indica di lo sigui cu e trabou y proyectonan di e Comandante saliente, Jan Ten Hove. “Mi a papia ampliamente cu mi colega Jan ten Hove y mi ta bon na altura kico ta sperami,” el a bisa.
El a bisa cu e kier sigui cu e trabou cu tabata wordo haci door di Jan ten Hove, kende a pone, el a bisa, un bunita vision tanto pa e Kazerne como pa e trabou den area Caribense. “Mi kier sigur finalisa loke e tabata kier a logra.” Un programa cu Marinierskazerne a bin ta colaborando cu Aruba cu ne ta Trayecto di Formacion Social, conoci tambe como SVT, cual Comandante Dishoeck a enfatisa cu ta un programa hopi importante pa comunidad di Aruba y cu ta bay sigui haya su sosten den tur loke e por yuda cu ne. Marnierskazerne y Arumil ta traha estrechamente cu oficina di Formacion Social (SVT). Por lo menos 4 luna cada grupo ta pasa na e base naval na Savaneta como parti di nan training fisico bou guia di Arumil, prome cu nan sigui pa otro materianan den un trayecto cu ta dura total full 1 aña.
Comandante ten Hove tabata hopi involucra den varios trabou na beneficio di comunidad di Aruba, banda di su trabou como comandante di marinierskazerne na Savaneta. Un di nan cu ta resalta y cu e tabata hopi dedica na dje ta ‘Stichting Natural Bridge’, cu tin como meta pa haci un intento pa debolbe Aruba su icono unico. Comandante van Dishoeck a enfatisa cu e tambe kier sigui cu e trabou bunita na beneficio di Aruba.
Riba e pregunta di con a bay cu e reunion cu el a sostene hunto cu su colega ten Hove y Prome Minster di Aruba Mike Eman, el a bisa cu e tabata un encuentro hopi intersante. El a agrega si cu el a yega di topa e Prome Minster Eman na diferente ocasion caba tempo cu e tabata ocupa e funcion di ayudante di Minister di Defensa di Hulanda y el a bishita e area aki varios biaha. Loke a resalta den e encuentronan aki ta cu “cooperacion ta importante y cu trahando hunto nos ta logra hopi mas. Nos por ta chikito, pero hunto nos ta logra hopi. Pesey mi kier un bon cooperacion cu Marinierskazerne, SVT, Arumil y pa traha cu bon cu KPA, KIA, Kustwacht y naturalmente Gobierno.”
Na salida di nan reunion cu Prome Minster Eman, ten Hove y van Dishoeck a topa cu Minister Plenipotenciario na Hulanda Alfonso Boekhoudt.