Hulanda tin cu reforsa urgentemente su ehercito pa ta prepara p’e posibilidad di un conflicto militar cu Rusia, cu ta “cada biaha mas fuerte,” e comandante di e Forsanan Arma Hulandes, martin Wijnen, a declara den un entrevista cu De Telegraaf.
Di acuerdo cu Wijnen, debi n’e echo cu durante hopi aña e pais a biba cu e siguridad cu ya no lo tin conflicto nobo riba gran escala riba su teritorio, como tambe cu e recortenan presupuestario, awo Defensa Hulandes ta sufri un scarsedad grave di personal.
Fuera di esey Hulanda no tin servicio militar obligatorio, pa cual su Ehercito solamente ta forma pa solda profesional. Pero, segun e comandante den e caso di un guera real, e contingente aki no lo ta suficiente.
“Si nos cuminsa sufri perdida, ken lo bin na nan luga?… E Ehercito profesional tabata funciona bon den e temponan cu Hulanda tabata contribui n’e misionnan di mantencion di paz n’e luganan leu. Nos por a scoge pa participa of no.
Den e caso di un guera forsa, nos no tin e opcion ey. Hulanda mester siña bek cu henter e sociedad mester ta prepara ora cu cos bay malo,” Wijnen a bisa.
E ta sostene cu memey di e hostilidadnan na Ucrania, e poblacion Hulandes mester prepara p’e condicionnan di un conflicto arma. “Hulanda no mester pensa cu nos siguridad ta garantisa pasobra nos ta mas of menos 1500 kilometer (di e frontera Ucraniano). Rusia cada biaha ta mas fuerte. Solamente tin un idioma cu Rusia ta compronde: esun di un forsa arma poderoso. Nos mester traha riba nos preparacion operativo, sigura cu nos ta capaz di disuadi cualkier adversario,” el a declara.
Den e sentido aki, e gobierno ta destina awo miles di miyones di euro na Defensa y a lansa recientemente un iniciativa pa incorpora e hobennan den Ehercito. No ta trata di un servicio militar obligatorio, sino boluntario. Ya tin 600 boluntario, pero segun e comandante, “mester tin entre 2 pa 3 mil.”
E obhetivo ta pa reforsa e Forsanan Arma cu “entusiasta” di 18 aña cu, cu tempo, ta uni n’e soldanan profesional.