Eduard de Cuba, comandante di Bombero, a elabora loke a wordo papia durante di e briefing cu nan tabata tin awe mainta.
A sinta cu e klusterhoofden, esta hendenan specifico cu ta representa diferente departamento di Gobierno cu ta envolvi den desaster. Por bisa cu tur hende awor aki, mescos cu ayera nochi. Awor aki tin nan tarea y nan ta cla pa si algo mester pasa. Hopi hende cu experiencia den pasado cu awasero pisa, lama ta bira, cu bientonan fuerte, tambe tabata tey y tambe ta prepara pa esaki.
Locual a wordo finalisa awe mainta, ta cu Sociale Zaken, hunto cu Rode Kruis y Marinierskazerne, a keda cla cu nan plan y preparacionnan pa si mester, habri sea shelternan of tuma cantidad di hendenan cu tin mester pa yuda nan na e momentonan eynan.
E companianan di Utilidad, a indica cu nan ta cla. Nan ta prepara y nan ta wardando con e tempo lo desaroya su mes pa wak ki accion nan lo tuma. Si e mester bay asina leu, kico tur mester pasa. E no ta un sentido cu WEB lo cera of nan lo kita coriente. Esey ta un caso hopi extremo mester bin riba nos na Aruba cu esey mester pasa. Mester proteha e instalacionnan cu tin pasobra ta e unico cu tin riba e isla. Esey no lo ta e caso, pero si mester pasa, WEB, Elmar y otro utilidadnan tambe ta prepara pa esey.
E parti di transporte, tin cu remarca cu Aeropuerto lo keda habri. Ta na e aerolineanan pa nan tuma e decision si nan ta sigui bula Aruba durante e pasada di e tormenta aki y e wafnan di Barcadera y di Playa, nan ta bezig awor aki sacando e barconan y e embarcacionnan chikitonan for di waf pa evita daño na e barco, pero evita daño na e wafnan tambe cu nos tin.
Esaki ta un medida cu Directie Scheepvaart a tuma pasobra mester proteha instalacionnan aki tambe. Tin cu bisa cu ATA tambe ta hopi druk bezig cu e parti turistico, pasobra un parti hopi biaha afecta ta e strip di Malmok y e hotelnan cu nan ta bezig pa finalisa cu nan pa wak cu nan plannan ta up to date, si mester evacua turistanan for di e partinan abao, cu esey lo tuma luga na bon momento tambe. Lo bay tin extra patruya di polis riba caya y Brandweer tambe lo haya acceso na cierto autonan pa haci esaki, pa asina monitorea e lama, awasero y biento cu ta bay bin, pa asina tin un bista cu si mester, reacciona hopi lihe riba cualkier eventualidad.
E cantidad di awa cu biento lo bay bin, lo bay causa e molester, pero e no ta algo cu ta di un calidad extremo. Ta prepara pe y ta sinta ward’e yega y ta sigui monitor’e cada momento cu bin.
Tin hopi caminda cu awa, pero manera custumber tin cu dun’e chens di core bay, sea un dam un rooi of lama. Esey mester tuma luga.
Polis y Brandweer a stop tur hende cu tin vakantie, ATV pa tin extra hende na warda. Tin hende cu ta standby pa si algo mester pasa.
De Cuba a sigui splica cu mescos cu a wordo bisa ayera nochi, durante anochi cu ta bin aki, si bo no tin nada di haci riba caminda, no sali. Ta hopi popular cu un hende ta pone riba Facebook, por ehempel Sasakiweg ta bao di awa, pa hende sali bay wak, no haci’e. E personal ta bay ta bezig caba ta monitorea, pa yuda aki aya y no mester di extra presion eynan di hende cu ta bay haci gaweta y bay busca y haya nan mes den un problema.
Riba lama a pidi for di ayera caba pa si por, saca e botonan. For di e momento ey tambe, pa no haci uzo di lama, mientras cu e sistema ta pasa. No bay surf, bodyboard, saca bo boto, no bay haci’e, pasobra bo ta hinca bo mes den un riesgo mas pio na e momento eynan.
E parti hotel y Malmok, semper ta keda un parti hopi fragil. Ora cu e biento bira y lama bin di abao, esey ta e parti cu lo keda monitorea y patruya constant durante full e anochi pa wak con e ta bay. Si mester yega asina leu, lo avisa pa e hendenan sali. Si bo ta sintibo insigur, busca un famia, bay keda na e famia of busca un luga caminda cu bo por keda durante e anochi aki. Sigura e cas, prome cu sali, pero purba busca un otro localidad. Si bo keda bo cas y algo pasa toch, e ora autoridad tin cu bin y e ora e plan lo cuminsa pa evacua hende.
For di ayera nochi a bay un peticion di parti di minister pa sosten di marinierskazerne. Esey tambe, si mester di dje, e tey. A keda palabra cu Marinierskazerne tambe lo tin cierto personal na brandweer Tanki Flip. Esey ta si mester. Si e yega asina leu cu e ta bira algo hopi extremo pa Aruba, nan lo por tin un uitvalsbasis na Tanki Flip y na Savaneta. Tur eseynan a wordo palabra y a keda regla awe mainta.
Locual cu tur aña, hunto cu Bureau Rampenbestrijding y coleganan di Calamidad cu tur aña ora di preparacion pa horcan, ta haci’e. Awor aki ta pidi hende, mirando cu ta biniendo biento fuerte, si tin cos los den cura, mara nan. Si tin bestianan di cas, trece nan paden. Si sa cu bo dak ta un tiki los, mar’e, clab’e. Tur e cosnan aki ta yuda. Si bo sa cu un mata ta dal riba dak, of un mata ta colga hopi, cort’e un rato, hal’e for di caminda, pa e yuda. Si bo por y bo ta mira cu tin un afwatering, un gril riba caminda cu ta yenando cu sushi, si bo por, coy un halado, bo ta yuda bo mes, bo ta yuda e bario di dañonan mas extenso. Di mes tambe pa tin e flashlight na man, cumindanan extra, un tiki awa, si acaso algo bay of algo mester pasa cu tin cu kita suministro di awa of coriente momentaneamente pa tin’e como backup.
Ta wak e proximo notificacion di Meteo cu ta bin pa 6’or, pa mira kico ta bay duna. E pronostico no ta bay ta mucho diferente. E ora di parti di Brandweer ta bisa cu te eynan e ta bay keda mesun cos.
Ta bay haci un bishita na e landelijk coordinatie centrum pa bay wak e instalacionnan, pa bay cuminsa prepara eyden tambe pa por sea caso mester wordo yama.
Te awor aki e situacion lo keda mesun cos. Solamente si bin un noticia di meteo cu el a bira mas grandi, el a empeora e ora lo tuma contacto cu prensa mas lihe posibel pa asina informa pueblo tambe kico ta pasando.
Ta bay percura pa keda trankil y no crea panico dimas tampoco.