BOGOTA, Colombia – Corte Supremo a duna orden di captura y a pidi Interpol emiti un alerta cora pa su ubicacion y aresto pa e wordo extradita.
Diahuebs Colombia a ofrece un recompensa di casi 1 miyon dollar pa Jesus Santrich, ex hefe di FARC, busca pa cargonan di narcotrafico y cu lo por a huy pa Venezuela, segun gobierno a declara.
E agencia AFP a informa cu e general di polis Oscar Atehortua a anuncia ariba Twitter un “recompensa di te cu 3 biyon peso” pa cualkier persona cu por duna informacion cu lo por conduci na e captura di Seuxis Paucias Hernandez -nomber legal di Santrich.
Mas trempan den dia, presidente di Colombia, Ivan Duque a bisa cu e congresista y ex negociado di guerrilla FARC lo por a huy pa Venezuela.
“E posibilidad aki ta di berdad ya cu e ta cerca di e zona di unda el huy, pa cual nos ta monitor esaki cu tur e autoridadnan competente”, e mandatario a agrega den un entrevista na e radio emisora Emisora Atlantico di e ciudad di Barranquilla.
Cu su 52 aña y cu problema visual serio, Santrich a bira un di e hombernan mas busca den e pais despues di cu diamars e no a cumpli di presenta den corte pa declara den e investigacion ariba su supuesto involucracion den narcotrafico despues di a firma e acuerdo di paz na 2016.
Corte Supremo a duna orden di detencion den su contra y a pidi polis internacional (Interpol) pa emiti un alerta cora pa su ubicacion y aresto pa e wordo extradita.
Santrich a bandona su sistema di siguridad dia 30 di juni. El a wordo mira pa ultimo biaha den un zona di reincorporacion di ex combatientenan den e zona noord di Colombia, cual ta alimenta e sospechonan di cu e lo a pasa bay pa Venezuela.
Santrich semper a bisa di ta inocente y cu e acusacionan ta parti di un complot di Merca y Ministerio Publico Colombiano pa stroba e implementacion di e acuerdo cu a pone un fin na mei siglo di conflicto.