Internacional: Gobierno di Colombia, presidi pa Gustavo Petro, a dicidi di desplega un operacion militar den e departamento di frontera di Norte de Santander, debi na e cercania di e eleccionnan presidencial na Venezuela. Esaki ta wordo informa inoficialmente door di medionan di comunicacion Infobae.
“Den un reunion porta cera, lidera pa e gobernador di Norte de Santander, William Villamizar, a establece medidanan pa preveni desorden publico den areanan di frontera, segun prensa regional”, e agencia ta detaya.
Villamizar a confirma cu nan lo no cera e crusamento di frontera, aunke nan lo adopta medidanan adicional pa responde si sosode iregularidad òf alteracion di orden publico.
Venezuela tambe lo pone restriccion
E medida aki di parti di Colombia ta coincidi cu e anuncio di e minister Venezolano di Defensa, Vladimir Padrino López, kende a emiti un resolucion estableciendo un control estricto riba frontera entre 26 y 29 di juli.
Den e resolucion ta establece cu durante e periodo aki lo hiba supervision riguroso di tur ruta di transito: tera, aereo y laman.
Ademas ta prohibi cargamento di arma, bendemento di bibida alcoholico y encuentronan publico. E Mando Strategico Operacional di Forsanan Arma Nacional Bolivariano (Ceofanb) lo ta responsabel pa implementa e medidanan aki pa garantisa integridad di e fronteranan.
