BOGOTA/DEN HAAG- Gobierno di Hulanda a expresa su apoyo na Colombia pa su maneho di e crisis general pa e exodo di Venezolano y a proceso di paz, durante e bishita di e mandatario Hulandes, Mark Rutte.
Rutte, cu a yega Colombia diaranson, a reuni diahuebs cu e presidente Colombiano, Ivan Duque na Casa del Nariño, y eynan el a reconoce e trabao di e gobierno Colombiano y di otronan den e region pa atende cu e casi 2.3 miyon Venezolano cu a bandona nan pais, segun cifranan di ONU.
Na mes momento, e prome mandatario Hulandes a anuncia cu e lo pone algo mas di 4 miyon dollar na disposicion di e Organisacion Internacional pa Migrancion pa atende cu e migracion Venezolano.
“Ta increibel pa wak con Colombia y otro paisnan den region ta trahando hunto pa yega na un solucion. Hulanda ta apoyo nan y nos kier yuda nan. Pa es motibo aki, nos lo pone na disposicion di e Organisacion Internacional di Migracion cuater miyon dollar pa yuda Colombia den e ricibimento di e migrantenan Venezolano den e region”, el a bisa.
Segun datonan di ONU, mas di un miyon Venezolano a yega Colombia, huyendo di e crisis social, politico y economico cu e pais ta bibando.
Na esaki mester agrega e casi 35 mil Venezolanonan cu ta crusa e frontera diariamente buscando alimento, remedi of pa bandona nan pais definitivamente.
Rutte a felicita gobierno di Duque den su posicion fuerte pa cu e dialogonan di paz cu e ehercito di Liberacion Nacional (ELN) cu ta para te ora cu e guerrilla stop tur nan actividad criminal, specialmente secuestro.
Aki tambe Rutte a afirma cu Hulanda ta sumamente preocupa pa cu e situacion cu e guerrilla ta genera na Colombia, aunke el a señala cu su pais ta “dispuesto na apoya” e proceso di paz aki, “na momento cu e partidonan dicidi na reanuda e combersacionnan”.
Pa cu esaki, Rutte a anuncia cu Hulanda lo agrega 2 miyon dollar mas na e Fondo Fiduciario di Union Europeo pa paz na Colombia.