BOGOTA, Colombia – Autoridadnan migratorio di Colombia, a desmenti awe e firmacion cu e presidente di Venezuela a haci diadomingo, riba e supuesto “migracion en masa” di e Colombianonan pa nan pais.
E Oficina di migracion Colombia a confirma cu, contrario na loke Maduro a afirma, den e ultimo añanan tabata mas Colombiano cu a regresa na e pais compara esnan cu a sali pa Venezuela.
“Na 2015 a sali pa Venezuela 371.521 Colombiano, mientras cu a drenta 374.462. Pa 2015 a sali pa Venezuela 109. 580, mientras cu a ingresa 113.356,” e Oficina a detaya.
Segun e organismo migratorio, consulta pa e emisora Caracol Radio, “Venezuela a pasa di ta e di dos destino di e Colombianonan den exterior pa ta na di ocho luga.”
Durante e programa televisivo “Los Domingos con Maduro”, e mandatario a desestima cu actualmente ta existi un oleada di imigracion Venezolano pa exterior, manera su opositornan ta denuncia, sino cu mas bien ta e pais petrolero ta loke a transforma den un luga di oportunidad pa imigrantenan.
“Hende ta biniendo di Colombia y di Europa pa biba na Venezuela pa distinto rason,” Maduro a sostene, kende a agrega cu “e cifranan ta impresionante.” “Aña pasa a drenta for di Colombia, solamente di Colombia, 100 mil compatriota Colombiano,” el a puntualisa.
Maduro a manifesta cu su Gobierno tabata tin cu haci frente na un “migracion en masa” for di Colombia” y a cita como ehempel e yegada di 359 Refugiado na e estado fronteriso di Zulia, cu lo ta huyendo for di e guera civil Colombiano apesar di e reciente acuerdonan di paz entre e Gobierno y guerilla di FARC.
Fuente: El Universal