Samuel Dumfries, docente y miembro di team di maneho di Colegio San Nicolas, ta splica cu ta hopi imporante pa sociedad tambe sa locual nan na Colegio San Nicolas ta haciendo. Esaki ta un custumber caba pa e scol pero nunca nan a ilustra esaki den media pero awor ta haci esaki specialmente pa inspira y motiva otronan tambe durante e temporadanan diferente aki cu nos ta bibando.
Esaki ta un iniciativa cu a crece y bini for di Fundacion pa nos Muchanan, hunto cu e zorgteam lidera pa sra. Robin-Ann Didder y alumnonan di e scol tambe, ta preparando makuto e ultimo dianan aki pa muchanan cu menos recurso na Colegio San Nicolas. “Nos tin un aña hopi pisa, un aña cu COVID19, cu yen di reto, financieramente tambe. Nos di parti Colegio San Nicolas kier a duna algo bek pa nos sociedad, pero den nos sociedad di Colegio mas pa nos muchanan,” segun sr. Dumfries.
Den esaki nan tin e mayornan, e muchanan mes, e docentenan y coleganan, cierto companianan tambe cu a yuda den esaki bao direccion di e zorgteam cu sra. Didder. A forma 60 pakete pa duna esaki nan na muchanan cu menos recurso na Colegio San Nicolas mes. E muchanan cu mester haya esaki a wordo escohi na diferente manera, di parti di nan trahado social, manteniendo privacidad y di parti di Sociale Zaken tambe a haya cierto informacion. E partimento lo ta cu un team di docente cu gratuitamente lo tuma e paketenan y trece esaki na diferente cas di alumnonan.