Colegio San Hose contento cu nan plenchi a keda liso y bunita

Johnson’s Enterprises pa algun aña caba ta distribuidor di un producto pa seya y proteha asfalt. Nan a purba pa introduci e asina yama “seal coating” cerca DOW anteriormente y actualmente porfin a logra haya e prome trabou, cual tabata pa pone un capa riba e plenchi di scol na Colegio San Hose na Santa Cruz.

Rina Croes, kende ta cabesante suplente di e scol, a splica cu e renobacion di e schoolplein tabata riba nan lista di deseo y plannan di embeyecemento, cu ta inclui haci e plenchi sigur y agradabel pa e muchanan. A pidi asfalt nobo, y a logra tambe pa un parti di proyecto, y pa e otro parti cu a keda a haya e “coating”.

Representante di Johnson’s Enterprises, Jonathan Tromp a remarca cu e seal coating ta un concepto nobo cu tin dos proposito, esta di proteha e asfalt existente pa algun aña mas y pa duna e asfalt su color preto bek, pues haci’e atractivo pa wak atrobe. E compania a traha hopi di cerca cu DOW pa realisa y proyecto aki, cual ta evita pa mester kibra e asfalt existente pa pone nobo. E producto aki ta e futuro pa cu mantencion di asfalt, el a agrega.

E schoolplein di Colegio San Hose tin probablemente 30 aña sin haya un bon mantencion, segun Croes. El a agrega cu e scol ta contento cu nan a logra loke nan tabatin mester di dje, esta embeyece e scol pa e muchanan y haci’e agradabel y sigur pa nan por hunga, awo riba un vloer liso y bunita.

Comments

comments