Ayera e canal di noticia 24ora.com a publica un articulo tocante di e situacion alarmante di uzo marihuana den scolnan secundario. Den e articulo y den e video cu a acompaña e articulo ta tuma Colegio San Antonio como ehempel di un scol cu ta afrontando dificultad cu e situacion aki. Como scol nos kier aclara cu na ningun momento a tuma contacto 24ora pa publica dicho articulo ni tampoco a duna 24ora e informacion encuanto e situacion den scol. Alavez nos kier indica cu scol a haci un peticion pa kita e video caminda alumno ( cu no ta aluno di Colegio San Antonio ) ta Sali, pa por proteha nan como cu ta trata di menor di edad. Mester bisa cu 24ora no a honra e peticion di scol.
Nos ta purba mas tanto posibel di mantene un canal di informacion habri cu mayor. No ta nos postura pa sconde loke ta problemanan cu nos alumnonan y boso yiu ta pasa aden of ta haya nan mes confronta cu nan den nos scol. Pa e motibo aki tambe hunto cu SKOA a traha riba diferente plan di maneho, entre otro documento encuanto droga y arma den scol cu ttur mayor ta firma na momento di inscripcion.
Como scol nos ta trata hopi di cerca cu instancianan manera ta Famia Planea, FADA, CAA, Witgele Kruis y Telefon pa Hubentud. E ta hinca den nos programa escolar pa e instancianan aki bishita nos scol y papia cu nos alumnonan por lo menos un biaha cada aña escolar. Di e forma aki nos ta purba di duna e alumno informacion y traha di forma preventivo.
Colegio San Antonio tambe ta tene su mes na e procedura stipula den e maneho di droga ( drugsbeleid ) di SKOA y ta atende di forma directo y mas discreto posibel cu e alumno y mayor si acaso tin sospecho di uzo, posecion of benta di droga. Nos ta respeta e privacidad di e alumno y ta purba crea un espacio caminda e por traha riba su problemanan bou guia intterno como tambe extermo.
Por ultimo nos kier indica cu e discucion rond di e uzo di marihuana den nos sociedad pa algun aña caba ta un “hot topic” . E punto mas importante pa nos como organisacion cu ta trata cu e hoben ta,cu nos ta keda indica cu e uzo di droga na un edad jong ta stroba e desaroyo y crecemento di e mucha su cerebo. Na Colegio San Antonio nos kier pa e alumno uza, ni tine den su posecion y mucho menos bende cualkier topi di droga. Te cu e dia di awe e ta keda considera un substancia ilegal pa nos leynnan.
Nos ta spera di por conta cu boso apoyo y susten.
Directorado y personal di Colegio San Antonio Mavo.