Diabierna a tuma luga na Colegio Laura Wernet Paskel un tremendo actividad di mucha pa mucha. Esaki ta trata di un songfestival unda cu mas di 10 mucha a participa cu canticanan di mucha for di di e buki “Nos ta Canta” y “Magia di Fantasia” .
Un ambiente den cura di scol, participantenan cu a wordo acompaña live cu banda di De Trupialen y mayor nan y famia nan pa apoya e muchanan no a falta.
Den e show nan den e ora intermedio un grupo di mucha a presenta un baile di cinta cual tambe nan a train na scol. E actividad aki tabata uno exitoso cu sigur lo permiti nan yega na e meta di un C-touch Screen ademas di logra otro aspectonan personal na cada alumno di e scol cu a participa. Sigur pa muchanan esaki tabata un temporada di preparacion unda cu nan mester a siña letra di un cantica for di cabes, siña con pa interpreta e cantica y train cu un banda live cu no pa tur mucha ta facil.
Un pabien na e comision di docente nan cu a pone e festival aki ariba pia, tanto durante e preparacion y ehecucion di e songfestival aki.
Nos seccion social di Mas Noticia ya a wordo poni na altura pa reserva 1 di december 2023 unda cu lo tin continuacion di e songfestival. Ademas Colegio Laura Wernet gradici tur mayor y tur sponsor pa nan colaboracion na e exitoso actividad aki.
Ariba combinacion di potret por mira mas di e actividad aki cu tabata di mayor nan ariba pia y hopi atento na e participacion di cada alumno.