Den un mainta di celebracion den cuadro di nos Dia di Himno y Bandera, Colegio Laura Wernet-Paskel a haci uzo di e oportunidad pa reconoce e trabou boluntario di un di nan ex-alumnonan cu, pa hopi tempo, ta yuda mantene e scol den diferente aspecto. Den presencia di Minister President, sra. Evelyn Wever-Croes, y coleganan Minister Xiomara Maduro y Minister Chris Romero, Parlamentarionan y como tambe alumnonan y personal di e scol mes, a duna honor na sr. Andres “Modechi” Werleman door di nombra e hofi di scol na su nomber.
Sr. Andres “Modechi” Werleman no ta un persona desconoci den nos mundo cultural y di agricultura. Fundador di Tipico T.A.K.L.A y un amante di su raiznan Arubiano, Modechi tin un amplio conocemento di Aruba su agricultura tradicional y artesanal. Conoci tambe pa su obranan di man traha cu cadushi, Modechi semper a pone su gran conocemento na disposicion di nos generacionnan di mas hoben, cu e meta pa keda mantene nos identidad cultural lo mas intacto posibel, pero semper dunando espacio pa amplia esaki. Di e manera aki Modechi ta inculca den nos muchanan, for di edad hopi hoben, e amor pa nos Aruba y esaki a keda ilustra un biaha den su trabou den e hofi di Colegio Laura Wernet-Paskel.
Aña pasa e Cabesante di Colegio Laura Wernet-Paskel, sra. Bernadetta Figaroa-Geerman, a aserca Departamento di Agricultura Cria y Pesca/Santa Rosa, cu e peticion pa haya un colaboracion pa articula e proyecto di hofi na su scol. Cu hopi alegria y satisfaccion Minister Romero a tuma e peticion aki y, un biaha mas, a impulsa e Departamento pa yuda realisa e hofi di Colegio Laura Wernet-Paskel. Santa Rosa na su turno a sigura di duna apoyo constante den con y kico pa haci pa por tin un hofi productivo, como tambe ta duna e scol gordura pa por mantene e matanan.
Awendia e studiantenan y personal di Colegio Laura Wernet-Paskel ta gosa di un hofi cu ta produciendo diferente fruta y berdura cu por disfruta caba. Cu hopi orguyo mastronan y alumnonan di e scol a comparti prueba di e fruto di nan hofi cu tur esnan presente, cual a duna e detaye refrescante y cultural na e bunita mainta aki.
Masha pabien na Colegio Laura Wernet-Paskel cu nan Hofi Modechi cu ta produciendo hopi bon mes, como tambe na Modechi mes pa e trabou voluntario desplega y e honor mereci cu el a haya.