Colegio EPI a duna un presentacion riba tur loke cu ta tumando luga cu e projecto di Erasmus+. Esaki no por a tuma luga prome mirando cu durante di pandemia tur cos a wordo para momentaniamente. Durante e temporada e Colegio EPI a traha duru pa alcansa tur e exigencia y metanan cu ta wordo pidi pa por ta parti di e projecto di Erasmus+.
E meta principal di Erasmus+ ta pa entre otro brinda e oportunidad pa staff, personal y studiantenan por bishita diferente pais cu como meta pa engrandece nan conocemente y adkeri experticio riba nan tereno como tambe serca contacto cu diferente scol y companianan internacional. Colegio EPI a cuminsa e projecto aki cu 5 studiante cu a bay Gent, Belgica pa dos siman. Durante di e bishita aki studiantenan a haya e oportunidad pa conoce e pais, su cultura como tambe varios scol den e area di nan estudio.
E siguiente grupo cu a bay tabata di 3 studiante ci a bay haci nan pasantia den exterior. Un studiante a bay Irlanda y dos a bay Belgica pa 4 luna unda cu nan a haci nan pasantia di forma exitoso y a adkeri hopi experiencia nobo y conocemento cu sigur nan lo por sigui aplica den nan futuro estudio y trabou.
A finalisa e proyecto pa e aña aki cu 6 miembro di staff cu a sali pa Europa pa asina bishita varios luga pa haya mas conocemento riba nivel di staff y docente. Nan a bishita Belgica y Irlanda pa 10 dia largo na unda cu a logra haya mas lugar di pasantia pa nos studiantenan den futuro y hopi contacto mas. Tambe nan a adkeri mas conocemento den e habilidadnan necesario pa loke cu ta ‘Job Shadowing’ den siglo 21.
Pa recapitula tur informacion e grupo di trabou di Erasmus+ di Colegio EPI a papia di e plannan pa futuro di e projecto aki y tambe di nan cooperacion cu otro scolnan internacional. Pa finalisa nan a tuma e momento pa gradici Erasmus+ pa yuda financia e projecto aki dunando studiante, staff y personal di Colegio EPI di expande, adkeri y crece nan conocemento y experiencia di trabou.
