CARACAS, Venezuela – Un grupo di siguidor di e Gobierno Venezolano, a irumpi violentamente diaranson den e sede di Parlamento, di mayoria opositor, unda cu e diputadonan tabata realisa un sesion special pa e dia di independencia.
Decenas di persona, algun cu cara tapa, cu palo y bisti na cora, a drenta den e hardinnan di e Palacio Legislativo y a detona algun vuurwerk, desatando e caos, un ekipo di AFP a constata.
Por a nota cu e gruponan violento a pidi pa medionan paga e camaranan y nan a kita e microfono di un reportera di Venevision, di acuerdo cu reportenan di e portal Contrapunto.
Riba rednan social, e diputadonan Venezolano, a revela videonan cu a mustra e momento caminda cu e grupo a ingresa den e Parlamento.
E grupo tabata dilanti di e edificio legislativo den un “planton” di seis ora como rechaso na oposicion, pero durante e receso di e sesion solemne, nan a forsa e porta grandi y a logra yega te na e gang y entradanan na e sala.
Julio Borges, presidente di e Asamblea di mayoria opositor, a reporta riba Twitter, cu den e “atake” a resulta herida e diputadonan Armando Armas, Americo de Grazia, Nora Bracho, Luis Carlos Padilla y Leonardo Regnault.
Americo de Grazia “tabata tin convulsion” y a wordo traslada den ambulance pa un centro medico, su colega Juan Guaido a señala na periodistanan, indicando cu e agresornan tabata tin “piedra, palo y cuchiu.”
E diputado Richard Blanco a denuncia cu e colectivonan a acciona armanan di candela y a tira gasnan lagrimogeno, segun e corant El Nacional a reporta, cu tambe a informa cu e colectivonan a agredi e parlamentarionan cu obhetonan contundente. Algun di nan a cay abao y a ricibi schop di e suhetonan. Di e mesun manera, tin reporte cu varios periodista a wordo agredi. Funcionarionan di Guardia nacional Bolivariano (GNB) a aparece tras di e invasino aki.
Asamblea Nacional, di su banda, a anuncia cu nan lo entrega video na Ministerio Publico y pruebanan di e incursion pa nan delanta e investigacionnan riba e asalto, cu, nan ta sigura, a wordo “perpetra pa e Gobierno.”
Fuente: www.elespectador.com